अर्जुन ट्रफीके उपाधि सिवाइसी अत्तरियाहे
पहुरा समाचारदाता
धनगढी, २८ माघ । धनगढीमे जारी अर्जुन ट्रफी राष्ट्रिय क्रिकेट प्रतियोगिताके फाइनलमे फ्रेण्ड्स क्लब डडेल्धुराहे स्तब्ध परटी सिवाईसी अत्तरिया अर्जुन ट्रफीके उपाधि चुमल हो । सोम्मारके धनगढीके फाप्ला अन्तर्राष्ट्रिय क्रिकेट मैदानमे ३४ रनसे डडेल्धुराहे पराजित कैटी अत्तरिया उपाधि जित पारल हो ।
जितके लाग ११९ रनके मध्यम स्कोर पछ्याइना क्रममे डडेल्धुरा १८ ओभरमे अलआउट हुइटी ८४ रन किल बनाइ सेकल रहे ।
११९ रनके लक्ष्य पछ्याइना क्रममे डडेल्धुराके गजेन्द्र बोहरा सर्वाधिक २४ रन बनाइल रहिट । ओस्टके कुशल भुर्तेल २०, अशोक धामी ११ रन बनाइल रहिट । अन्य ब्याट्सम्यान दोहरो अङ्कके रन बनाइ नैसेकल रहिट ।
डडेल्धुराहे लक्ष्यमे पुग्ना रोकक लाग अत्तरियाका साहब आलम ओ दीपेश कँडेल समान ३–३ विकेट लेहल रहिट । ओस्टके कमल गुप्ता ओ विवेक यादव समान २–२ विकेट लेहल रहिट ।
उहीसे टस जिटके पहिले ब्याटिङ करल अत्तरिया २० ओभरमे ९ विकेट गुमैटी ११८ रन बनाइल रहे ।
अत्तरियाके लाग रसिद खान सर्वाधिक ३१ रन बनाइल रहिट । ओस्टके सन्तोष कार्की ओ शङ्कर राना समान २०–२० रन बनाइबर सन्दीप क्षेत्री १२, विवेक यादव ११, भीम सार्की १० रन बनाइल रहिट ।
डडेल्धुराके लाग अभिषेक गौतम ४ विकेट लेहल रहिट । ओस्टके अजय चौहान ओ कुशल भुर्तेल फेन एक एक विकेट लेहल रहिट । अत्तरियाके तीन खेलाडी रन आउट हुइल रहिट । प्रतियोगितामे विजेता टिम नगद १० लाख ओ उपविजेता नगद ५ लाख सहित ट्रफी पैना बाटै ।
