चिसापानी–गड्डा चौकी सडकखण्ड छ लेनके बनीः परराष्ट्रमन्त्री
पहुरा समाचारदाता
लम्की, २८ माघ । परराष्ट्रमन्त्री आरजु राणा देउवा पूर्वपश्चिम महेन्द्र राजमार्गके चिसापानी–गड्डाचौकी सडकखण्ड छ लेनके बनाइक लाग हाली काम सुरू हुइना बटैले बाटी ।
कैलालीके लम्कीचुहा नगरपालिकाके नवनिर्मित प्रशासकीय भवनके सोम्मारके उद्घाटन कैटी मन्त्री देउवा सवारीके चापहे मध्यनजर कैटी कैलालीके चिसापानीसे कञ्चनपुरके गड्डाचौकीसम छ लेनके बनाइक लाग सर्वेक्षण कैना काम हुइटी रहल बटैली ।
उहाँ कहली, “राजमार्गहे छ लेन बनाइक लाग सुदूरपश्चिम प्रदेशके मुख्यमन्त्री कमलबहादुर शाह पहल करटी रहल बाटै । राजमार्गके अब्बे सर्वे कैना काम हुइटी रहल बा । छ लेनके सड्क निर्माणके लाग हाली काम सुरू हुइ ।”
मन्त्री देउवा लम्कीचुहा नगरपालिकाके प्रशासकीय भवन इ नगरके नगरवासीलहे एकीकृत सेवा लेना सहज हुइना विश्वास व्यक्त करली । उहाँ इ क्षेत्रके कृषि क्षेत्रके समग्र विकासके लाग सरकार गम्भीर रहल बटैटी स्थानीयस्तरमे हुइल विकास निर्माण डेखेबर अपने उत्साहित हुइल बटैली ।
कुछ दिनसे सुदूरपश्चिके कैलालीमे रहल मन्त्री देउवा नेपाली कांग्रेस कैलाली क्षेत्र नम्बर २ ओ लम्कीचुहा नगरसमितिके नवनिर्मित पार्टी कार्यालय बिपी स्मृति भवनसमेत उद्घाटन करल रही ।
