शिक्षा ऐन हाली बनीः गृहमन्त्री लेखक
पहुरा समाचारदाता
धनगढी, २८ माघ । गृहमन्त्री रमेश लेखक संसदमे विचाराधीन अवस्थामे रहल शिक्षा ऐन हाली बन्ना बटैले बाटै ।
निजी तथा आवासीय विद्यालय अर्गनाइजेसन (प्याब्सन) सुदूरपश्चिम समितिके चौथो अधिवेसनके सोम्मारके धनगढीमे उद्घाटन कैटी उहाँ उहाँ उ बात बट्वाइल हुइट । गृहमन्त्री लेखक शिक्षा ऐन आइलपाछे निजी, संस्थागत, आवासीय विद्यालयके सुरक्षा सरकारसे कैना बटैलै । उहाँ कहलै,“अपनेनके लगानी खेर जाइ नैडेब । लगानीहे सुरक्षित करजाइ । ओ, अपनेहुक्रे फेन मजा हुइटी जाइ परल । अपनेहुक्रे अपनहे सुधार नैकैबी कलेसे हस्तक्षेप करे पर्ना ठाउँमे सरकार पुगी ।”
नेपालके शिक्षा क्षेत्रमे निजी, आवासीय तथा संस्थागत विद्यालयके महत्वपूर्ण योगदान रहल लेखकके कहाइ रहे । उहाँ सामुदायिक विद्यालयहे मजा बनैना ओ निःशुल्क शिक्षा डेना काम सरकारके रहल उल्लेख कैटी संस्थागत, निजी ओ आवासीय विद्यालयके कारण सामुदायिक विद्यालयके स्तर नैघटल बटाइल रहिट । उहाँ कहलै,“ओहेमारे डुनु मेरके विद्यालयहे जुझैनाके कौनो औचित्य नैहो । प्रतिस्पर्धा करैनाके आवश्यकता फेन नैहो ।”
शिक्षामे निजी क्षेत्रके महत्वपूर्ण भूमिका रहल कहटी गृहमन्त्री यकर संरक्षण कैनामे सरकार स्पष्ट रहल बटैलै । उहाँ कमीकमजोरी सक्कु क्षेत्रमे रहल उल्लेख कैटी रहल विकृति विसंगतिहे ठीक करे पर्ना औंल्याइल रहिट ।
“अपनेहुक्रे फेन अनुशासित हुइ परल । सरकारसे फेन तद् अनुरुप अनुगमन, विश्लेषण करे परल”, उहाँ कहलै,“मने मारे नैपरल उहीसे मजा नैकरठ् ।”
उहाँ निजी, आवासीय विद्यालयमे रहल लगानीसे शिक्षाके गुणस्तर वृद्धि करल बटाइल रहिट । शिक्षाके गुणस्तर वृद्धिसे हमार जनशक्ति अन्तर्राष्ट्रिय जनशक्तिसंग प्रतिस्पर्धा करक लाग तयार हुइल लेखकके कहाइ रहे । गृहमन्त्री लेखक शिक्षा क्षेत्रमे मुलुक आघे बह्रल बटाइल रहिट ।
एक छुट्टे प्रसंगमे उहाँ सरकारसे नीतिगत ओ कानुनी सुधारमे प्राथमिकता डेहल बटाइल रहिट । ओस्टके, सुदूरपश्चिम प्रदेशके पूर्व मुख्यमन्त्री राजेन्द्रसिंह रावल निजी विद्यालयसे विद्यार्थी जनशक्ति ओ पुँजी पलायन रोक्ना काम करल बटाइल रहिट ।
कार्यक्रममे बोलुइया प्याव्सनके पदाधिकारीहुक्रे निजी तथा आवासीय विद्यालय ओर लगानीके बातावरण बनाडेहक लाग सरकारसे स्पष्ट नीति तथा ऐन कानून बनाडेहे पर्ना जोड डेहल रहिट ।
इहे बिच शिक्षा क्षेत्रमे योगदान पुगाइल कहटी पाँच जाने व्यक्तित्वहे निजी तथा आवासीय विद्यालय अर्गनाइजेसन (प्याब्सन) सुदूरपश्चिम समितिसे सम्मान करले बा ।
धनगढीमे सोम्मारके हुइल चौथो अधिवेसनके अवसरमे प्याब्सनसे उहाँहुक्रनहे सम्मान करल हो । सम्मानित हुउइयामे शिक्षाविद् एवम् सुदूरपश्चिम विश्वविद्यालयके पूर्व रजिष्ट्रार डा. हेमराज पन्त, सुदूरपश्चिम नीति तथा योजना आयोगके सदस्य डा. हिरा चन्द, शिक्षासेवी कैलाशप्रसाद दाहाल रहल बाटै ।
ओस्टके, पञ्चोदय माध्यमिक विद्यालयके पूर्व प्रधानाध्यापक यादवप्रसाद जोशी, शिक्षासेवी डिल्लीराज जोशी सम्मानित हुइल बाटै । गृहमन्त्री रमेश लेखक उहाँहुक्रनहे दोसल्ला ओह्राके सम्मानपत्र हस्तान्तरण करल रहिट ।
कार्यक्रम निजी तथा आवासीय विद्यालय अर्गनाइजेसन (प्याब्सन) सुदूरपश्चिम समितिके अध्यक्ष ललित चन्दके घरगोसियाइमे हुइल रहे ।
