चैतन्यसे वार्षिकोत्सवके पूर्व सन्ध्यामे विविध कार्यक्रम
पहुरा समाचारदाता
धनगढी, १ फागुन । कैलालीके धनगढीमे रहल चैतन्य पाठशालासे वार्षिकोत्सवके पूर्व सन्ध्यामे विविध कार्यक्रमके आयोजना करल बा ।
धनगढी उपमहानगरपालिका–५, शिवनगरमे रहल चैतन्य पाठशालासे वार्षिकोत्सवके पूर्व सन्ध्यामे आँखी जाँच, दन्त तथा प्राथमिक स्वास्थ्य जाँच ओ रक्तदानके साथे सरसफाई कार्यक्रमके आयोजना करल हो ।
चैतन्य पाठशालासे यिहे फागुन ३ गते अपन २४ औं वार्षिकोत्सव मनैना तयारीमे बा । चैतन्य पाठशालाके अध्यक्ष गणेश प्रसाद जोशी पाठशालाके २४ औं वार्षिकोत्सवके अवसरमे आँखी जाँच, दन्त तथा प्राथमिक स्वास्थ्य, रक्तदानके साथे सरसफाई लगायतके कार्यक्रम आयोजना करल बटैलै ।
शिविरमे स्थानीय, अभिभावक तथा बालबालिकाहुक्रे परिक्षण कराइल अध्यक्ष जोशी बटैलै । कान्तिपुर होम एण्ड इन्स्टिच्युटके डाक्टर ऋतुराज खड्का शिविरमे २ सय १० ढेरसे सेवा लेहल बटैलै । दन्त परिक्षण करैना अधिकांसके दाँतमे किरा लागल भेटल उहाँ बटैलै ।
सुदृष्टि आँखा केन्द्रके वरिष्ठ दृष्टि विषेज्ञ सावित्री भट्ट शिविरमे एक सय ३५ जाने आँखी चेकजाँच करल बटैलै । उहाँ चेकजाँचमे आइल मध्ये ८० प्रतिशतसे चश्मा लगाई पर्ना भेटल बटैलै । शिविरमे १५ प्वाइन्ट रगत संकलन हुइल रेडक्रस जनैले बा ।
दन्त परिक्षणमे कान्तिपुर होम एण्ड इन्स्टिच्युट, आँखी परिक्षणमे सुदृष्टि आँखा केन्द्र, प्राथमिक स्वास्थ्य परिक्षणमे रुमिना फार्मेसी एण्ड क्लिनिक ओ रक्तदान शिविरमे प्राविधिक सहयोग नेपाल रेडक्रस सोसाईटी प्रादेशिक रक्त सञ्चार सेवा केन्द्र धनगढी करल रहे ।
