एकिकृत महिला स्वास्थ्य मेलामे ३४४ जाने सेवा लेलैं

पहुरा समाचारदाता
धनगढी, १३ फागुन । कैलाली जिल्लाके गौरीगंगा नगरपालिका वडा नम्बर ४ राजीपुरमे हुइल एकिकृत महिला स्वास्थ्य मेलामे ३ सय ४४ जाने सेवा लेले बटै ।

गौरीगंगा नगरपालिका स्वास्थ्य शाखा ओ महिला पुनस्र्थापना केन्द्र (ओरेक)के सयुक्त सहकार्य ओ आयोजनामे हुइल एकिकृत महिला स्वास्थ्य मेलामे ओटरा महिला तथा किशोरीहुक्रे उपचार तथा परामर्श सेवा लेहल ओरेक नेपाल कैलालीके जिल्ला संयोजक गीता चौधरी जनैली ।

एकिकृत महिला स्वास्थ्य मेलामे महिलाके अङ खस्न (पाठेघर खसल) समस्याके पहिचान, रिंगपेसरी सेवा एवं यौनजन्य संक्रमणके लाक्षणिक उपचार सेवा, बच्चा पासेकल भोज हुइल ओ प्रौढ उमेरके महिला प्रजनन् स्वास्थ्य समस्या रहल किशोरीहुकनके लाग स्वास्थ्य मेला आयोजना करल रहे । स्वास्थ्य मेलामे महिला तथा किशोरीहुकनहे लैंगिक हिंसा, महिला तथा किशोरीहुकनके प्रजनन स्वास्थ्यके कारण, उपचार, घरेलु जडिबुटीके प्रयोग लगायत विषयमे अभिमुखीकरण ओ महिलासे अपन समस्या खुल्के धारे सेक्ना वातावरण तयार कैना, महिलाहुकनके प्रजनन स्वास्थ्य समस्याके कारणके विश्लेशन कैना उद्देश्यसे मनोविमर्श कर्तासे बाटचित करल रहे ।

महिला स्त्री रोग बिशेषज्ञसे निःशुल्क चेकजाँच, समस्या अनुसारके निःशुल्क औषधी, पाठेघर खसल महिलामे रिङ पेसरी धारल

ओ आठ ठो जटिल समस्या रहल महिलाहे सेती प्रादेशिक अस्पतालमे सिफारिस करल संयोजक चौधरी जनैली ।

स्वास्थ्य मेलाके उदघाटन गौरीगंगा नगरपालिकाके नगर प्रमुख देवीदत्त कंडेल करल रहिट । उ मेलामे स्वास्थ्यकर्मी, महिला स्वास्थ्य स्वयं सेविका, महिला जनप्रतिनिधि, मनोविमर्श कर्ताहुकनके सहभागिता रहे ।