कैलारीमे छैठौं अध्यक्ष रनिङ कप सुरु

पहुरा समाचारदाता
हसुलिया, १५ फागुन । कैलारी गाउँपालिका स्तरीय छैठौं अध्यक्ष रनिङ कप २०८१ खेलकुद प्रतियोगिता विफेक रोजसे सुरु हुइल बा । कैलारी यूथस यूनाईटेड क्लव ओ कैलारी फुटवल संघके संयूक्त आयोजना तथा कैलारी गाउँपालिकाके मुख्य प्रवद्र्धकमे उ प्रतियोगिता हुइटी रहल बा ।

कैलारी गाउँपालिका–३ स्थित यौङ व्वाइज क्लवके खेल मैदानमे हुइटी रहल प्रतियोगिताके खेलकुद प्रतियोगिता गाउँपालिका अध्यक्ष राजसमझ चौधरी एक कार्यक्रमके विच उदघाटन करल रहिट ।

उदघाटन कार्यक्रममे बोल्टी उहाँ खेलाडीनहे मुलुकहे राष्ट्रिय अन्तर्राष्ट्रियमे चिन्हैना काम करटी रहल बटैले बटै । एक थरिके यूवा लागु औषधके दुव्र्यशनीमे फस्टी रहल ओरसे यूवाहे खेलकुदमे व्यस्त धारे सेक्लेसे कुलतसे बचाई सेक्ना बटैलै । गाउँपालिकासे खेलकुदमे बार्षिक लाखौ रकम खर्च करटी रहल ओरसे खेलाडीसे लगानीअनुसार प्रतिफल डेखैना जरुरी रहल बटैलै ।

कैलारी गाउँपालिका वडा नम्बर ३ के वडा अध्यक्ष सन्तराम चौधरी खेलकुद खेलाडीनहे अनुशासनमे बँध्ना करल बटैलै । समाज सुधार कैनामे यूवाहुकनके महत्वपूर्ण योगदान रहल कहटी खेलकुद विकासके लाग स्थानीय तहसे कौनो कमी नैराखल बटैलै ।

खेलकुद विकास समिति कैलालीके सदस्य मनिराम चौधरी अनुसाशन पूर्वक खेलकुद सम्पन्न कैना आग्रह करलै । उहाँ कहलै, पालिकास्तरीय अध्यक्ष कप खेलाडीके टिम छनौटके लाग हो । यम्ने मजासे खेलकुद प्रर्दशन करे सेक्लेसे टमान ठाउँमे अवसर मिल्न मौका आई ।’

फुटवल प्रतियोगिताके उदघाटन कार्यक्रममे पुष्पलक्ष्मी कन्स्ट्रक्सन प्रालिके पु्ष्प भुषाल प्रतियोगिताके शुभकामना डेहल रहिट ।
कैलारी यूथस यूनाईटेड क्लवके अध्यक्ष बनसराम चौधरीके अध्यक्षतामे हुइल खेलकुद उदघाटन कार्यक्रममे स्वागत मन्तव्य क्लवके सचिव सुनिल चौधरी ओ संचालन मञ्जु चौधरी करल रहिट ।

उदघाटन कार्यक्रममे नौ वडाके वडा अध्यक्ष, कार्यपालिका सदस्य, वडा सदस्य, गाउँपालिकाके टमान शाखाके प्रमुख, टमान राजनितिक दलके प्रतिनिधि, यूवा क्लव, भल्मन्सालगायत खेलाडीहुकनके सहभागिता रहल रहे । कार्यक्रममे थारु संस्कृतिक नाँच डेखागैल बा ।

गाउँपालिका स्तरीय अध्यक्ष रनिङ कपमे पुरुष ओ महिला फुटवलके पहिल हुइना टिमहे ५० हजार नगद प्रमाणपत्र, मेडल ओ ट्रफी पैही । दुसर टिम ३० हजार नगद प्रमाणपत्र, मेडल ओ ट्रफी पैही । ओस्टेक करके उत्कृष्ट खेलाडी, सर्वाधिक गोलकर्ता, उत्कृष्ट गोल रक्षक ओ उदयमान खेलाडी १५÷१५ सय नगद रुप्या प्रमाणपत्र, मेडल ओ ट्रफी पैही ।

प्रतियोगिताके पुरुष भलिवलके पहिल विजेता २५ हजार नगद रुप्या, प्रमाणपत्र, मेडल ओ ट्रफी दुसरा टिमहे १५ हजार, वेस्ट स्पाइकर, वेस्टलिफटर १५÷१५ सय नगद रुप्या प्रमाणपत्र, मेडल ओ ट्रफी पैना आयोजक जनैले बा ।

पुरुष व्याडमिन्टनहे पहिल राशी १० हजार, दुसराहे ५ हजार नगद रुप्या ओ प्रमाणपत्र, मेडल ओ ट्रफी पैही । ओस्टेक करके पुरुष क्रिकेटमे पहिल राशी २५ हजार, दुसराहे १५ हजार, वेस्ट व्याटर, वेस्ट बलर १५÷१५सय नगद प्रमाणपत्र, मेडल ओ ट्रफीके व्यवस्था रहल आयोजक जनैले बा ।