नवजीवन अस्पताल १९औं वार्षिकोत्सव टमान कार्यक्रम करके मनाइल
पहुरा समाचारदाता
धनगढी, १७ फागुन । सुदुरपश्चिम प्रदेशके निजीस्तरके लगानीसे संचालित पहिल नवजीवन अस्पताल प्रालि आपन १९औं वार्षिकत्सव समारोह विविध कार्यक्रम करके मनैले बा ।
२०६२ साल फागुन १७ गते १५ शैयाके अस्पतालके स्वीकृती लेके संचालन करटी आइल यी अस्पताल रक्तदान, विमारीहुकनहे फलफुल वितरण, उत्कृष्ट समाजसेवी, कर्मचारीहुकनहे सम्मान ओ ट्राफिक प्रहरीहुकनहे ६० ठो डिभाइडर हस्तान्तरण करके मनागिल अस्पातलके अध्यक्ष यज्ञराज ढुङगाना जनैलै । यी अस्पताल निजी लगानीमे संचालन हुइलेसेफे सामाजिक उत्तरदायित्व अनुरुप अपन पहलमे ओ नेपाल सरकारसंगेक सहकार्यमे भारी ओ छोट करके स्थापना कालसे स्वास्थ्य शिविर संचालन करटी आइल उहाँ जनैलै ।
यी अस्पतालसे नेपाल सरकारसंग हातेमालो करटी आमासुरक्षा कार्यक्रम, खोप कार्यक्रम, क्षयरोगके विरामीके निःशुल्क औषधी वितरण कार्यक्रम समेत संचालन करटी आइल अध्यक्ष ढुङगाना बटैलै ।
यी अस्पताल २०६६ सालसे स्वास्थ्य सेवा विभाग काठमाडौं से ५० शैयाके संचालन स्वीकृती लेके संचालनमे रहलमे २०७९ कुवाँरसे १०० शैयामे स्तरोन्नती करल उहाँ जनैलै । यी अस्पतालसे विगतके दिनमे कोभिड संक्रमणके बेला नेपाल सरकार संग हातेमालो करटी अपन स्रोत ओ साधनसे भ्याइटसम कोरोना माहामारी नियन्त्रणमे भरमग्दुर प्रयास करल ओ उ समयमे टड्कारो रुपमे डेखा परल अक्सीजन अभावके समस्याहे हृदयंगम करटी अपने लगानीमे अस्पताल प्राङगणमे अक्सीजन प्लान्ट समेत स्थापना करसेकल उहाँ जनैलै ।
सुदूरपश्चिम प्रदेशमे बह्रटी करल डाईलासिसके विरामीहुकनहे सहजीकरण करेक लाग मार्क ईन्टरनेशल किड्नी सेन्टर, काठमाडौं संगके सहकार्यमे अस्पताल प्राङगण भिटरे १० शैयाके डाइलासिस सेवा संचालनमे ल्यानल बा । जौन यी भेगके निजी लगानीमे सचालनमे ल्यानल पहिल कार्यक्रमफे हो, उ कार्यक्रममे आवद्ध विरामीनहे नेपाल सरकार संग सम्झौता करके निःशुल्क रुपमे सेवा प्रदान करटी आइल बा । ओस्टेक करके यी अस्पताल सामाजिक सुरक्षा कोषमे दर्ता हुके सामाजिक सुरक्षा कोष्मे आवद्द हुइल श्रमीकहे एसएसएफ कार्ड डेखाके ओ.पी.डी ओ आई पी. डीमे ८० प्रतिशत तथा दुर्घटना हुइलहे १०० प्रतिशत निःशुल्क उपचार डेटी आइल अध्यक्ष जनैलै ।
सुदूरपश्चिम प्रदेश भर सुचीकृत तया आवद्ध अस्पतालभरमे सबसे ढेर विरामीहे सेवा डेहल वाफत सामाजिक सुरक्षा कोष दिवसके अवसर पारके यिहे आर्थिक बर्षमे यी अस्पतालसे सम्मानपत्र समेत प्राप्त करले बा । जौन अन्तरगत कार्डसे सामान्य विरामीसे २५ हजारसमके उपचार करे ओ भर्ना हुइल खण्डमे १ लाखसमके भर दुर्घटना हुके उपचार करल खण्डमे ७ लाखसमके उपचार कराई सेक्ना जनागिल बा । यी अस्पतालसे अस्पतालजन्य सेवाके अलावा टमान शैक्षिक कार्यक्रम समेत संचालनमे ल्यानल जनैले बा ।
यी अस्पतालसे यिहे आर्थिक बर्षसे सामन्य चिकित्सा ओ फार्मेसी अध्यापन कार्यक्रम संचालनमे ल्यानल अस्पतालके मेडिकल डाईरेक्टर डा. विदुरमणी ढकाल जनैलै ।
यी अस्पतालसे हाड जोर्नी तथा नसा रोग, प्रसुती तथा महिला रोग, बालरोग, जेनरल तथा ल्याप्रोस्कोपिक सेवा, मानसिक तथा स्नायुरोग, पेट, छाती तथा मुटुरोग, एनेस्थेसियोलोजिष्ट एवं क्रिटीकल केयर सेवा विशेषज्ञ डाक्टरहुकनसे प्रत्येक दिन प्रदान करटी रहल जनैलै ।
मुटुरोग विशेषज्ञ (कार्डियोलोजी), नेफोलोजि(डाईलासिस विशेषज्ञ हरेक शुक ओ शनिच्चर, छाला (चर्मरोग), एजली, यौन (गुप्तरोग) तथा सौन्दर्य विशेषज्ञ प्रत्येक दिन, नाक, कान तथा घाँटी रोग, युरो सर्जन तथा मिनि पेन्सिल विशेसज्ञ प्रत्येक दिन, न्युरो सर्जन, स्पाईन सर्जन, दन्तरोग तथा बरिष्ठ म्याक्जोफिशियल सर्जन, फिजियोथेरापिष्ट प्रत्येक दिन प्रदान करल डाईरेक्टर ढकाल जनैलै ।
ओस्टेक रेडियोलोजी सेवा प्रत्येक दिन लगायत आइसियु, एनआइसियू, डाइलासिस, सिटिस्क्यान सेवा प्रदान करटी आइल बा ।
नवजीवन अस्पतालसे आर्थिक बर्ष २०८० फागुनसे २०८१ माघ मसान्तसम ईमरजेन्सीसे सेवा पाइल जम्मा विरामी सख्या ४ हजार ४९, बहिरंगसे सेवा ३२ हजार १८८, अन्तरंगसे सेवा पाइल ५ हजार ६९७, निःशुल्क सुत्केरी सेवा लेहुइया सख्या १५ सय ३९, निःशुल्क खोप सेवा लेहल बालवालिको संख्या २ हजार ९६६ रहल अस्पतालके निर्देशक चक्रबहादुर खडायत जनैलै । ओस्टेक अस्पताल भिटर ओ टमान स्थानमे सञ्चालन हुइल स्वास्थ्य शिविरमे २ हजार ५१४ जाने निःशुल्क स्वास्थ्य सेवा पाइल उहाँ जनैलै ।
