घोडाघोडीहे जिल्लास्तरीय राष्ट्रपति रनिङ शिल्डके उपाधि

पहुरा समाचारदाता
धनगढी, १८ फागुन । कैलालीके घोडाघोडी नगरपालिकामे सञ्चालित १५औं जिल्ला स्तरीय राष्ट्रपति रनिङ शिल्ड प्रतियोगितामे घोडाघोडी नगरपालिका पहिल स्थान प्राप्त करले बा ।

कान्तिराज्य लक्ष्मी माध्यमिक विद्यालय पहलमानपुर ओ सुखड स्थित राष्ट्रिय माध्यमिक विद्यालयके खेल मैदानमे अँट्वारके सम्पन्न हुइल प्रतियोगितामे घोडाघोडी नगरपालिका २५ स्वर्ण, १४ रजत ओ २० कांस्य सहित जम्मा ५९ पदक प्राप्त कैके प्रथम स्थान हुइना सफल हुइल हो ।

प्रतियोगितामे २४ स्वर्ण, ९ रजत ओ ५ कांस्य सहित ३८ पदक सहित धनगढी उपमहानगरपालिका डुसरा ओ १२ स्वर्ण, १५ रजत ओ १२ कांस्य पदक जम्मा ३९ सहित गोदावरी टेसर हुइल बावै । प्रतियोगितामे प्रथम, द्वितीय ओ तृतीय पालिकाहे ट्रफि, मेडल ओ प्रमाणपत्र प्रदान करल बा ।

प्रतियोगितामे सहभागी अन्य पालिकामे गौरीगंगा नगरपालिका २९, लम्किचुहा नगरपालिका १३, टीकापुर नगरपालिका २२, मोहन्याल गाउँपालिका ६, जानकी गाउँपालिका ३, चुरे गाउँपालिका ३, बर्दगोरिया गाउँपालिका ३, भजनी नगरपालिका १ पदक जिट्ले बावै कलेसे कैलारी गाउँपालिका पदक विहीन हुइल बा ।

‘स्वास्थ्यके लाग खेलकुद, राष्ट्रके लाग खेलकुद’ कना मूल नाराके साथ १५औं कैलाली जिल्ला स्तरीय राष्ट्रपति रनिङ शिल्ड प्रतियोगिता सुरु हुइल रहे । कैलाली जिल्ला खेलकुद विकास समितिके आयोजना तथा घोडाघोडी नगरपालिकाके सह–आयोजनामे प्रतियोगिता सुरु हुइल रहे ।

प्रतियोगितामे विजेता समूहहे घोडाघोडी नगरपालिकाके नगरप्रमुख खडक बहादुर रावत पदक तथा नगद पुरस्कार प्रदान करल रहिट । कैलालीके १३ स्थानीय तहसे छनोट होके आइल खेलाडीहे जिल्ला स्तरीय रनिङ शिल्ड प्रतियोगितामे सहभागी हुइल रहिट । प्रत्येक बरस धनगढीमे हुइटी आइल जिल्ला स्तरीय राष्ट्रपति रनिंग शिल्ड प्रतियोगिता इ बरस कैलालीके घोडाघोडी नगरपालिकामे हुइल रहे ।

उ कार्यक्रममे खेलकुद समितिसे आगामी बरस हुइना १६ औँ जिल्ला स्तरीय राष्ट्रपति रनिङ शिल्ड प्रतियोगिता बर्दगोरिया गाउँपालिकामे कैना मेरके सम्झौता करले बा ।

प्रतियोगितामे भलिबल, कबड्डी, एथलेटिक्स, तेक्वान्दो ओ कराँते विधामे प्रतिस्पर्धा कराइल रहे । प्रतियोगितामे उत्कृष्ट हुइल विद्यार्थी मध्येसे प्रदेशस्तरीय प्रतियोगितामे सहभागी कराजैना जिल्ला खेलकुद समिति जानकारी डेले बा ।

गैल बरस धनगढीमे सम्पन्न हुइल १४ औँ कैलाली जिल्ला स्तरीय राष्ट्रपति रनिङ शिल्ड प्रतियोगितामे २२ स्वर्ण, १७ रजत ओ १७ कांस्य सहित ५६ पदक लानके घोडाघोडी नगरपालिका डुसरा हुइल रहे कलेसे ३० स्वर्ण, ६ रजत ओ ९ कांस्य सहित जम्मा ४५ पदक लानके धनगढी उपमहानगरपालिका पहिल हुइल रहे ।