सांस्कृतिक संग्राहलय निर्माणके लाग महायज्ञ हुइना
पहुरा समाचारदाता
धनगढी, १८ फागुन । कैलालीके धनगढीमे देशके सर्वोच्च पुरस्कारके लाग अक्षयकोष स्थापना तथा सांस्कृतिक संग्राहलय निर्माणके लाग श्रीमदभागवत सप्ताह ज्ञान महायज्ञ २०८१ हुुइना बा ।
सुदूरपश्चिमाञ्चल साहित्य समाजसे अँटवारके रोज आयोजित पत्रकारके सम्मेलनमे यिहे फागुन २१ गतेसे २७ गतेसम सप्ताहव्यापी महायज्ञ हुइना जानकारी डेगिल बा ।
महायज्ञके प्रमुख बाचिका भागवत मञ्जरी पूज्या राधिका दासी प्रवचनके साथे बाचन डेना जनागिल बा । पत्रकार सम्मेलनमे उपस्थित प्रमुख बाचिका भागवत मञ्जरी पूज्या राधिका दासी पु्ण्य कार्यके लाग हुइटी रहल महायज्ञमे सक्कु जाने सहभागीहुके सफल बनैना आग्रह करले बटी ।
सुदूरपश्चिमाञ्चल साहित्य समाजके अध्यक्ष तिर्थ पाण्डे ऐतिहासिक विरासत बोकल ओ टमान शक्तिपीठसे पवित्र ओ पावन रहल भूस्वर्ग सुदुरपश्चिमेली समाजमे धर्म, संस्कृति ओ अध्यात्म मार्फत नवीन संदेश डेना ओ भाषा, साहित्य, संस्कृति, पुरातत्व जैसिन बाडमयके क्षेत्रमे देशके सर्वोच्च पुरस्कारके लाग अक्षयकोष स्थापना कैना ओ सांस्कृतिक संद्रहालय निर्माणो पवित्र उद्देश्यसे श्रीमद्भागवत महापुराण ज्ञान महायज्ञ करे लागल बटैलै ।
भाषा, साहित्य, कला ओ संस्कृतिके उन्नयनके लाग २०५१ सालमे स्थापना हुइल यी सुदूरपश्चिमाञ्चल साहित्य समाजसे विगतके बर्षमे करल राष्ट्रिय तथा अन्तर्राष्ट्रिय साहित्यिक ओ सांस्कृतिक कार्यक्रमसे यी क्षेत्रके गौरव गाथा बह्रैटी साहित्यिक साँस्कृतिक जागरण ल्यानल बटैलै । महायज्ञ धनगढी उपमहानगरपालिका–१ पशुपति टोल, महोत्सवस्थलमे हुइना जनागिल बा ।
