सीपके प्रयोग करलेसे सिलाई कटाई व्यवसायमे कबु घाटा नैहुईः गाउँपालिका अध्यक्ष

पहुरा समाचारदाता
हसुलिया, १९ फागुन । कैलारी गाउँपालिका वडा नम्बर १ मे दुई महिने सिलाई कटाई तालिम सोम्मारके रोज निम्जल बा । कैलारी गाउँपालिकाके आयोजनामे गरिबी निवारणके लाग लघु उद्यम कार्यक्रम अन्र्तगत गैल पुष १४ गतेसे सुरु हुइल दुसरा तहके सिलाई तालिम निम्जल हो ।

तालिम समापन कार्यक्रमके प्रमुख अतिथि कैलारी गाउँपालिकाके अध्यक्ष राजसमझ चौधरी सिलाई कटाई व्यवसाय सीपके सदुपयोग ओ मेहनत कैना व्यवसाय रहल बटैलै । उहाँ कहलै,‘यी व्यवसायमे मेहनत करलेसे कबु घाटा नैलग्ना ओरसे जटरा ढेर मेहनत करलेसे ओटरे आम्दानी बह्राई सेक्जाइठ । पहिले पहिले थारु समुदायके कपरा सिलुइया गैरथारु समुदायके व्यक्तिनहे तिहाई डेके रख्ना चलन रहे । अब्बे यी सिलाई कटाई पेशाप्रति थारु समुदायके आर्कषण बह्रल बा ।’

गाउँघरमे अब्बे एक÷एक जाने सिलाई कटाई व्यवसाय कैना कर्रा रहलेसे सामुहिक रुपमे कैना ओ पाछे शहर बजारमे संचालन करेसेक्लेसे मजा आम्दानी कमाई सेक्ना उहाँ बटैलै ।

एक व्यक्ति टमान मेरिक तालिम लेहल डेखजाईठ, गाउँपालिका अध्यक्ष कहलै, ‘मनै तालिम लेके व्यवसाय करे चाहठै । सीप सबसे धन हो । जेकर हाठेम सीप कलेसे कबु भुखे नैमारी । कबु वेरोजगार नैरही मने व्यावसाय करेक लाग इच्छा शक्ति भर हुई परल ।

कैलारी गाउँपालिकासे ढकिया बनैना तालिम डेहुवाई ओ उत्पादन हुइना ढकिया बजारीकरणके लाग बाटफे चलाई मने ढकिया तालिम लेहुइया अब्बे सीप सिखके घरे बैठल उहाँ बटैलै ।

वडा नम्बर १ के वडा अध्यक्ष धोजहरिपाल बोहरा सिलाई कटाई व्यवसाय छोट लगानीसे घरहीसे सुरुवाट करसेक्ना बटैै । यी व्यवसायमे मेहनत करलेसे घाटा नैरहल ओरसे जटरा मेहनत करलेसे ओटरे निख्खार अइना बटैलै ।
उहाँ कहलै, अब्बे वडा वडासे सिलाई कटाई तालिमके लाग बजेट विनियोजन हुइल ओरसे सीप सिखके सदुपयोग कैना जरुरी बा ।’

कार्यक्रमके अध्यक्ष तथा वडा नम्बर ३ के वडा अध्यक्ष सन्तराम चौधरी सिखल सीपके सदपयोग करटी व्यवसाय संचालन करलेसे केल विनियोजन करल बजेट ओ प्रशिक्षकके सिखाई सीप काम लग्ना बटैलै । समापन कार्यक्रममे प्रशिक्षार्थी कोमल चौधरी यी तालिमसे व्यवसाय करेसेक्ना अवस्था पुगाइल बटैली । टिसरा चरणके तालिम पैलेसे झन निखार ल्याने सेक्ना उहाँ बटैली ।

तालिम समापन कार्यक्रमके संचालन मेडपाके प्रदीप चौधरी ओ स्वागत मन्तव्य निर्मला चौधरी करल रहिट । समापन कार्यक्रममे वडा सदस्यहुक्रे अनारकली चौधरी, शकुन्तला चौधरी, शिकारी चौधरी, लिलावती चौधरी, मेडपा संयोजक तथा कृषि शाखा प्रमुख मैयाकुमारी चौधरी, रन्जित कठरियालगायतके सहभागिता रहे ।

दुई महिना तालिममे प्रशिक्षण विन्द्रा चौधरी डेहल रहिट । कलेसे १५ जाने तालिम लेहल रहिट ।