सामुदायिक विद्यालयके बालबालिका व्यवहारिकः गापा प्रमुख
पहुरा समाचारदाता
धनगढी, २० फागुन । कैलाली जिल्लाके कैलारी गाउँपालिका वडा नम्बर १ स्थित दिपेन्द्र माविके ४८औं वार्षिकोत्सव तथा अभिभावक दिवस मंगरके रोज एक कार्यक्रमके विच भव्यताके साथ सम्पन्न हुइल बा ।
विद्यालय व्यवस्थापन समिति विरप्रसाद चौधरीके अध्यक्षतामे हुइल कार्यक्रममे प्रमुख अतिथि कैलारी गाउँपालिका अध्यक्ष राजसमझ चौधरी रहल रहिट । कार्यक्रममे सम्बोधन करटी उहाँ शैक्षिक गुणस्तरके शिक्षक, अभिभावक, विद्यालय ओ स्थानीय सरकारके समन्वय आवश्यक रहल बटैलै ।
उहाँ कहलै, ‘शैक्षिक गुणस्तर ल्यन्ना अक्केली प्रयाससे नैहुइठ । यकर लाग सक्कु जानेक समन्वय आवश्यक बा । नीजि विद्यालयमे अध्ययनरत विद्यार्थीके तुलनामे सामुदायिक विद्यालयमे अध्ययनरत विद्यार्थीनहे व्यवहारिक ज्ञान मजा रहल भेटल बा । गाउँपालिकासे गुणस्तरीय शिक्षा ओ खेलकुद विकासके लाग लागल ओरसे अभिनफे शिक्षक होए व भौतिक पूर्वाधार होए लगानी लगैना तयार रहल गाउँपालिका अध्यक्ष बटैलै ।
दिपेन्द्र माविहे स्वर्गिय छिमानन्द महतों ३ विघा जग्गा दान करल ओरसे यदि बहुमुखी क्याम्पस स्थापना हुइलेसे छिमानन्द बहुमुखी क्याम्पस नामाकरण कैना उहाँ बटैलै ।
धनटीका युगान्त अक्षयकोष २०७२ छात्रवृतिके सञ्चालक तथा पूर्व विद्यालय व्यवस्थापन समिति अध्यक्ष होमबहादुर गुरुङ कैलारी गाउँपालिकामे एक ठो बहुमुखी क्याम्पस स्थापनाके लाग २०७२ सालमे महायज्ञ लगाइल मने बहुमुखी क्याम्पस हुई नैसेक्ना एक ठो विदम्बना रहल बटैलै ।
उहाँ कहलै, ‘क्याम्पस स्थापनाके लाग महायज्ञ लगाईबेर ८४ लाख रुप्या संकलन हुईल रहे । अब्बे ओकर व्याज आके करिब १ करोडसे ढेर पुगल बा ।
क्याम्पस सम्बन्धनके लाग तयारी हुईबेर नेकपा माओवादी नेतृत्वके सरकार हुईबेर राजनितिक दलविच बहुमुखी क्याम्पस बनैना कि प्राविधिक क्याम्पस बनैना विवाद हुईबेर बहुमुखी क्याम्पस नैबनल उहाँ बटैलै ।
कार्यक्रममे कैलारी गाउँपालिका वडा नम्बर १ के वडा अध्यक्ष धोजहरिपाल बोहरा विद्यार्र्थीनहे विद्यालय पठाडेलेसे केल नैपुग्ना हुइल ओरसे आपन लर्कनप्रति अभिभावकहु्क्रे चासो डेहे पर्ना जरुरी रहल बटैलै ।
कैलारी गाउँपालिका शिक्षा शाखा प्रमुख गणेश प्रसाद मिश्र शिक्षा कार्यान्वयन करुइया सामुदायिक विद्यालय रहल बटैलै । जेकर कोई नैहो, गरिव असहायके लाग सामुदायिक विद्यालय रहल उहाँ बटैलै । दिपेन्द्र माविहे जग्गा दाता गौरीशंकर महतो अपन बाबा दिपेन्द्र माविहे ३ विघा जग्गा करल मने मुल्याङकन नैकरल बटैलै । कैलारी उद्योग बणिज्य संघके अध्यक्ष नेपालु चौधरी विद्यार्थीके अवस्था बुझना अभिभावक विद्यालयके आई पर्ना जरुरी रहल बटैलै ।
उहाँ कहलै, नीजि विद्यालयमे पह्राईबेर अपन लर्कनके केयर कैना मने सामुदायिक विद्यालयमे पह्राईबेर खासे वास्ता नैकरल डेखल हो ।
कार्यक्रममे राष्ट्रिय मावि भुइयाँफाँटाके प्रअ रामकुमार चौधरी, राष्ट्रिय मावि विचैपुर विद्यालय व्यवस्थापन समितिके अध्यक्ष नविन बोहरा, दिपेन्द्र मावि प्लस टु संयोजक पिरमराज पन्तलगायत मन्तव्य राखल रहिट ।
कार्यक्रममे विद्यालयके लेखापाल नरेशकु्मार चौधरी विद्यालयके आर्थिक बर्ष २०८०÷०८१ सालके २ करोड ८ लाख १८ हजार १९१ रुप्या बराबरके आयव्यय सुनाइल रहिट ।
ओस्टेक विद्यालयके प्रअ विनोद प्रसाद भट्टराई विद्यालयके प्रगति विवरण सुनाइल रहिट । वार्षिकोत्सवके अवसरमे विद्यालयमे स्थापना हुइल धनटीका युगान्त अक्षयकोषसे ८ जनहनहे प्रति विद्यार्थी ३ हजारके दरसे पुरस्कृत कैगिल बा । ओस्टेक एसइई ओ प्लस टु मे मजा मार्क ल्यानल तीन जाने विद्यार्थीनहे प्रतिव्यक्ति पाँच हजारके दरसे पुरस्कृत कैगिल बा ।
ओस्टेक चार जाने शिक्षक, अभिभावकहुकनहे सम्मान कैगिल बा । ओस्टे शैक्षिक तथा खेलकुद विधाके पुरस्कार वितरण कैगिल बा । कार्यक्रममे स्वागत मन्तव्य विद्यार्थी निशान्त चौधरी, स्वस्तिका विक ओ अर्पण चौधरी करल रहिट ।
कार्यक्रमके संचालन शिक्षक नारायण ढकाल करल रहिट । बार्षिकोत्सवके अवसरमे दिपेन्द्र माविमे नवनिर्मित चार कोठे भवनके उदघाटन कार्यक्रमके प्रमुख अतिथि तथा गाउँपालिका अध्यक्ष राजसमझ चौधरी करल रहिट ।
