कैलारी छैठौं अध्यक्ष रनिङ कप सम्पन्न

पुरुष फुटवलके उपाधि वडा–३ ओ महिला फुटवलके उपाधि वडा–६ हे

पहुरा समाचारदाता
हसुलिया, २१ फागुन । कैलारी गाउँपालिका स्तरीय छैठौं अध्यक्ष रनिङ कप २०८१ खेलकुद प्रतियोगिता बुधके रोजसे सुरु सम्पन्न हुइल बा । कैलारी यूथस यूनाईटेड क्लव ओ कैलारी फुटवल संघके संयूक्त आयोजना तथा कैलारी गाउँपालिकाके मुख्य प्रवद्र्धकमे उ प्रतियोगिता हुइल रहे ।

कैलारी गाउँपालिका–३ स्थित यौङ व्वाइज क्लवके खेल मैदानमे हुइल प्रतियोगिताके फुटवलके विजेता वडा नम्बर ३ बनल बा । कलेसे उपविजेता वडा नम्बर ४ बनल बा । फाइनल खेल अवधिमे दुनु वडाके खेलाडीविच प्रतिस्पर्धा हुईबेर एक÷एक गोल कैके बराबर हुईबेर पेनाल्टी सुटआउटमे वडा नम्बर ३ ठप दुई गोल करके विजयी हुइल रहे । कलेसे पेनाल्टी सुटआउटमे वडा नम्बर ४ एक गोल केल कैना सफल हुईल । विजेता टिम वडा नम्बर ३ नगद ५० हजार, शिल्ड प्राप्त करले बा । कलेसे दुसरा हुईल वडा नम्बर ४ नगद ३० हजार ओ शिल्ड प्राप्त करले बा ।

महिला फुटवलके विजेता वडा नम्बर ६ बनल बा । अपन प्रतिस्पर्धि वडा नम्बर ५ हे एक गोल मारके पहिल हुइल हो ।
विजेता टिम वडा नम्बर ६ नगद ५० हजार, शिल्ड प्राप्त करले बा । कलेसे दुसरा हुईल वडा नम्बर ५ नगद ३० हजार ओ शिल्ड प्राप्त करले बा ।

प्रतियोगिताके भलिवलके विजेता वडा नम्बर ७ बनल बा । कलेसे उपविजेता वडा नम्बर ९ बनल । पुरुष भलिवलके पहिल विजेता २५ हजार नगद रुप्या, प्रमाणपत्र, मेडल ओ ट्रफी दुसरा टिमहे १५ हजार नगद रुप्या प्र्रमाणपत्र, मेडल ओ ट्रफी पैले बटै ।

क्रिकेटके विजेता वडा नम्बर वडा नम्बर ६ ओ उपविजेता वडा नम्बर ५ बनल बा । विजेता २५ हजार, दुसराहे १५ हजार,
नगद रुप्या ओ प्रमाणपत्र, मेडल ओ ट्रफी पैले बटै ।

ओस्टेक व्याडमिन्टन खेलमे विजेता वडा नम्बर १ ओ उपविजेता वडा नम्बर ५ बनल बा । पुरुष व्याडमिन्टनहे पहिल राशी १० हजार, दुसराहे ५ हजार नगद रुप्या ओ प्रमाणपत्र, मेडल ओ ट्रफी पैलै ।

खेलकुद प्रतियोगिताके प्रमुख अतिथि गाउँपालिका अध्यक्ष राजसमझ चौधरी रहल रहिट । समापन कार्यक्रममे बोल्टी उहाँ खेलाडीनहे मुलुकहे राष्ट्रिय अन्तर्राष्ट्रियमे चिन्हैना काम करटी रहल बटैले बटै । एक थरिके यूवा लागु औषधके दुव्र्यशनीमे फस्टी रहल ओरसे यूवाहे खेलकुदमे व्यस्त धारे सेक्लेसे कुलतसे बचाई सेक्ना बटैलै । गाउँपालिकासे खेलकुदमे बार्षिक लाखौ रकम खर्च करटी रहल ओरसे खेलाडीसे लगानीअनुसार प्रतिफल डेखैना जरुरी रहल बटैलै ।

प्रतियोगिता समापन कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी पह्राई संगसंगे अतिरिक्त क्रियाकलाप आवश्यक रहल बटैली । अब्बे यूवाहे पह्राईमे केल नाही जेकर जेहोर रुची बा । उहे अनुसार व्यवस्था कैना जरुरी रहल बटैली । यूवाके सीपके स्क्रेनिङ करके सीपके विकास कैना जरुरी रहल उहाँ बटैली ।

कैलारी गाउँपालिका वडा नम्बर ३ के वडा अध्यक्ष सन्तराम चौधरी खेलकुद खेलाडीनहे अनुशासनमे बँध्ना करल बटैलै । समाज सुधार कैनामे यूवाहुकनके महत्वपूर्ण योगदान रहल कहटी खेलकुद विकासके लाग स्थानीय तहसे कौनो कमी नैराखल बटैलै ।

कैलारी यूथस यूनाईटेड क्लवके अध्यक्ष बनसराम चौधरीके अध्यक्षतामे हुइल खेलकुद समापन कार्यक्रममे स्वागत मन्तव्य कैलारी फुटवल संघके अध्यक्ष आरती चौधरी करल रही । ओ संचालन मञ्जु चौधरी करल रहिट ।

समापन कार्यक्रममे नौ वडाके वडा अध्यक्ष, कार्यपालिका सदस्य, वडा सदस्य, गाउँपालिकाके प्रमुख प्रशासकीय अधिकृत खजेन्द्रराज जोशी लगायत टमान शाखाके प्रमुख, टमान राजनितिक दलके प्रतिनिधि, यूवा क्लव, भल्मन्सालगायत खेलाडीहुकनके सहभागिता रहल रहे । कार्यक्रममे वडा नम्बर ३ थारु संस्कृतिक नाँच डेखागैल रहे । खेलकुड प्रतियोगिताके विजेता उपविजेता ओ सहभागी खेलाडीहुकनहे प्रमुख अतिथि, विशिष्ट अतिथि लगायत पहुननसे पुरस्कार वितरण करल रहिट ।