पालिकाके स्तरके बालअधिकार समितिके बैठक सम्पन्न

पहुरा समाचारदाता
हसुलिया, २२ फागुन । कैलाली जिल्लास्थित कैलारी गाउँपालिकाके वडाहे बालमैत्री घोषणाके लाग छलफल कैगिल बा ।

कैलारी गाउँपालिका महिला तथा बालबालिका शाखाके आयोजना ओ बालकल्याण संघ टिकापुरके आर्थिक सहयोगमे हुइल बैठकसे बालमैत्री स्थानीय शासन कार्यान्वयन निर्देशिका २०७८ के आधारमे यी पालिकाके वडाहे बालमैत्री स्थानीय शासन कार्यान्वयनके सुरुवाट कैना प्रयोजनके लाग गाउँपालिका स्तरीय बाल अधिकार समिति गठनहे शसक्त बनैटी वडाहे बालमैत्री घोषणाके लाग मंगरके रोज छलफल कैगिल हो ।

कैलारी गाउँपालिका उपाध्यक्ष तथा स्थानीय बाल अधिकार समिति संयोजक भगवतीकुमारी चौधरीके अध्ययक्षतामे हुइल बैठकमे पालिकाके वडाहे बालमैत्री घोषणा करेक लाग छलफल हुइल रहे ।

बालमैत्री स्थानीय शासन कार्यान्वयन निर्देशिका २०७८ अनुसार बालमैत्री घोषणाके लाग ५१ ठो सूचक डेहल बा । बैठकमे समितिके संयोजक भगवतीकुमारी चौधरी वडाहे बालमैत्री घोषणाके लाग न्यूनतम सूचक पुरा कैना आवश्यक रहल बटैली ।
उहाँ कहली, ‘बालमैत्री स्थानीय शासन कार्यान्वयन निर्देशिका २०७८ मे ढेर चिज समेटल बा । उहीहे पुरा करेक लाग सक्कु पक्षसे छलफल करके आघे बह्रलेसे केल सूचक पुरा करे सेक्जाई ।’

निर्देशिकाके बाल बचाउमे गर्भवती महिलाहे प्रसुति हुइना आघे ४ चो चेकजाँच, बच्चा जलम लेसेकपाछे डाई ओ बच्चाके ३ चो चेकजाँच हुई पर्ना, गर्भवती महिला २ चो टिटनस लगाईल हुई पर्ना, गर्भवती ओ सुत्केरी डाई २२५ ठो आइरन चक्की खाइल हुई पर्ना कहल बा ।

दक्ष स्वास्थ्यकर्मीसे सुत्केरी कराइल, बच्चाहे ६ महिना पूर्ण स्तनपान कराइल हुई पर्ना, ६ महिनासे पाँच बरसके लर्कन २ चो भिटामिन ए क्याप्सुल खवाइल हुई पर्ना, प्रत्येक बर्ष पूर्ण खोप लेहल हुई पर्ना कहल बा ।

एचआइभी संक्रमित डाईसे जन्मल बच्चा एआरभी प्रोफाइसिस पाइल हुई पर्ना, आयोडिन नोनके प्रयोग, कमतौल, पुडको, ख्याउटेपन हुइना पाँच बर्ष टरेक लर्कनके कमी हुई पर्ना, कुपोषण न्यून हुई पर्ना, आधारभूत तहके खानेपानीके सुविधा हुई पर्ना, सावुन पानीसे हात हुइना परिपाटीके विकास हुई पर्ना, खुला दिशा मुक्त घोषणा हुई पर्ना कहल बा ।

ओस्टेक करके बाल संरक्षणओर पाँच बरस टरेक लर्कनहे जन्मदर्ता हुई पर्ना, वाल श्रमके अन्त्य हुईपर्ना, स्थानीय तह बाल विवाह मुक्त हुईपर्ना, बालबालिका विरुद्ध हुइना हिंसाके अन्त्य हुई पर्ना, समुदायमे आधारित वाल संरक्षण प्रणाली स्थापित हुके सञ्चालन हुई पर्ना कहल बा ।

निर्देशिकामे छाउपडी, कमलरी प्रथाके अन्त्य हुई पर्ना, १४ बरस तरेक असहाय बालबालिकाके संरक्षण कैना विशेष व्यवस्था हुईल, सडक बालबालिका मुक्त हुईपर्ना, विद्यालयमे बालबालिकाहुकनहे शारिरीक तथा मानसिक यातना नैडेहल हुई पर्ना, कुलटमे लागल बालबालिकाहे बाल सुधारमे धारल हुईपर्ना कहल बा ।

ओस्टेक बालविकास ओर ४ बरस पुगल बालबालिकाहे प्रारम्भिक बालविकास कक्षामे भर्ना हुई पर्ना, फरक क्षमता रहल बालबालिकाहे हकमे विशेष व्यवस्था हुई पर्ना, पाँच बर्षसे १४ बर्ष पुरा करल बालबालिका शतप्रतिशत आधारभूत शिक्षा (कक्षा १ से ८ सम) लेहल हुई पर्ना कहल बा ।

छात्राछात्रके अलग अलग चर्पीके व्यवस्था हुईपर्ना, विद्यालयके भौतिक पूर्वधार बालमैत्री, अपाङतामैत्री ओ सुरक्षित हुई पर्ना कहल बा । विद्यालयमे अतिरिक्त क्रियाकलाप सञ्चलन हुईपर्ना, सरना नैसरना फोहर व्यवस्थापनके अलग अलग विर्सजन कैना व्यवस्था करल हुईपर्ना लगायत ५१ ठो सूचक निर्देशिकामे समावेश करल बा ।

बालमैत्री वडा घोषणाके लाग वल्र्ड भिजन इन्टरनेशनल नेपालके आर्थिक सहयोगमे बाल कल्याण संघ टिकापुरसे कैलारी गाउँपालिकाके वडा नम्बर ८ मे बालबालिकनके बाल समृद्धिके लाग काम अइटी रहल बाल कल्याण संघ टिकापुरके फिल्ड अधिकृत परशुराम चौधरी बटैलै ।

गौरीगंगा नगरपालिकाके वडा नम्बर १० मे बालमैत्री घोषणाके लाग गतिविधि सञ्चालन करलफे उहाँ जनैलै । गौरीगंगाके वडा नम्बर १० हे अइना आर्थिक बर्षके बैशाखसम बालमैत्री घोषणा कैना लक्ष्य लेहल उहाँ जनैलै ।

कैलारी गाउँपालिकाके वडाहे बालमैत्री घोषणाके लाग छलफल कार्यक्रममे गाउँपालिका अध्यक्ष राजसमझ चौधरी निर्देशिकामे रहल सक्कु सूचक कार्यान्वयन करेक लाग सम्बन्धित शाखाविच समन्वय करके जैना आवश्यक रहल बटैलै । बैठकमे समितिहे पूर्णता डेना ओ बाल भेला कैना निर्णयफे हुइल बा ।

बैठकमे वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, प्रमुख प्रशासकीय अधिकृत खगेन्द्रराज जोशी, शिक्षा शाखा प्रमुख गणेश प्रसाद मिश्र, सामाजिक विकास शाखा प्रमुख यगम कलेल, महिला तथा बालबालिका शाखा प्रमुख बालकुमारी चौधरी, स्वास्थ्य शाखाके सिअनमी अनिता चौधरीलगायतके सहभागिता रहे ।