धनगढीसे बैङलोरसम बस सेवा सुचारु

पहुरा समाचारदाता
धनगढी, २२ फागुन । श्री दुर्गा भवानी टुर एण्ड ट्राभल्स प्रालि धनगढीसे बैङलोर हुइटी चैन्नाईसम बस सेवा सुचारु करले बा ।

प्रालिसे विफेक रोज एक कार्यक्रममे विच कार्यालय तथा काउण्टरके उदघाटन ओ बस सेवा सुचारु हुइल जानकारी डेहल हो ।
श्री दुर्गा भवानी टुर एण्ड ट्राभल्स प्रालिके अध्यक्ष दिपेन्द्र पुजाराके अध्यक्षतामे हुइल कार्यक्रममे उहाँ सर्व सुलभ दरमे धनगढीसे बैङलोरसम बस सेवा सुचारु हुइल जानकारी डेलै । उ बस धनगढीसे गौरीफन्टा हुइटी नागपुर, भोपाल, हैदराबाद, बैङलौरसे चैन्नईसम पुग्न उहाँ बटैलै ।

उ बस सेवा ओ कार्यालय तथा काउण्टरके उदघाटन कैलाली उद्योग बाणिज्य संघके अध्यक्ष पुष्पराज कुवँर करल रहिट । कार्यक्रममे सम्बोधान करटी उहाँ यी बस सेवा नेपालीहुकन सहजे बैङलोर सहयोग पुग्ना वहाँसे भारतीय पर्यटकके आवगमन हुइना बटैलै ।

प्रालिके सञ्चालक धर्मराज सेठी दुर्गा भवानी टुर एण्ड ट्राभल्स प्रालि धनगढीसे बैङलोर हुइटी चैन्नाईसम बस सेवा सुचारु कैसेकल ओ आज काउण्टर तथा कार्यालयके विधिवत उदघाटन करल बटैलै । उहाँ कहलै, हम्रे २८ सय भारुमे बैङलोरसम पुग्ना भाडा तोक्ले बटी । जौन भाडा न्युनटम हो । पहिले पहिले यहाँके नेपाली बैङलोरसम जाईबेर विचमे ठग्वा पैना, सास्ती होए यी ट्राभल्ससे बस सेवा सुचारु करलपाछे यात्रु सन्तुष्ट रहल बटै ।

श्री दुर्गा भवानी टुर एण्ड ट्राभल्स प्रालि धनगढीसे सुदूरपश्चिम प्रदेश लगायत और प्रदेशमे सेवा डेटी आइल ओ महेन्द्रनगरसेफे बैङलोरसम बस सेवा सुचारु कैना जनैलै ।

धनगढीसे बैङलोर हुइटी चैन्नाईसम बस सेवा सुचारु उदघाटन कार्यक्रममे सञ्चालन पाण्डव पुजारा करल रहिट । कार्यक्रममे नेपाल पत्रकार महासंघ कैलालीके अध्यक्षलगायत प्रालिके सञ्चालकहुकनके सहभागिता रहे ।