आदिवासी जनजाति आयोगसे प्रदेश प्रमुखहे वार्षिक प्रतिवेदन बुझागिल

पहुरा समाचारदाता
धनगढी, २३ फागुन । आदिवासी जनजाति आयोगसे आर्थिक बरस २०८०÷८१ के वार्षिक प्रतिवेदन सुदूरपश्चिमके प्रदेश प्रमुख नजिर मियाँहे बुझाइल बा ।

उ आर्थिक बरसमे आयोगसे करल गतिविधि समेटल प्रतिवेदन आयोग सदस्य सुर्यबहादुर गुरुङ शुकके धनगढीमे प्रदेश प्रमुख मियाँहे बुझाइल हुइट । उहे अवसरमे प्रदेश प्रमुख मियाँ अपने फेन उ प्रतिवेदन अध्ययन कैना ओ आदिवासी जनजातिके समस्या समाधानके लाग सम्बन्धित निकायहे पहल कैना बटैलै । उहाँ प्रतिवेदन पढ्ना ओ प्रतिवेदनमे उल्लेख करल समस्या समाधानके लाग प्रदेश सरकारके पदाधिकारी ओ प्रदेश सभा सदस्यहे आग्रह कैना बटैलै ।

ओस्टके, आयोगसे अभौतिक सांस्कृतिक सम्पदा सूचिकरण सम्बन्धी अन्तरक्रिया करले बा । प्रदेश प्रमु्खहे प्रतिवेदन बुझासेकलपाछे आयोगसे धनगढीमे रहल आदिवासी जनजातिके टमान संघसंस्थाके प्रतिनिधि तथा आदिवासी जनजाति नेताहुक्रनसंग अन्तरक्रिया करल हो । उ अवसरमे आयोगके सदस्य गुरुङ अभौतिक सांस्कृतिक सम्पदाके विषयमे प्रस्तुतीकरण कैटी उ सम्पदा स्थानीय तहसे सूचिकृत कैके संरक्षण कैना आवश्यक रहल बटाइल रहिट ।