महिलाके आर्थिक सशक्तीकरणमे जोड

पहुरा समाचारदाता
धनगढी, २३ फागुन । सुदूरपश्चिम प्रदेशके ४० प्रतिशत महिला श्रम बजार बाहर रहल एक कार्यक्रममे बटाइल बा । धनगढीमे शुकके आयोजित मिडियासँगके अन्तरक्रिया कार्यक्रममे प्रदेशमे ढेर संख्यामे महिला श्रम बजार बाहर रहल बटाइल बा ।

घरायसी कामके कारण महिला श्रम बजारमे आइ नैसेकल सशक्त महिला समृद्ध नेपालके कार्यक्रम संयोजक सङ्गीता यादव बटैली । उहाँके अनुसार इ प्रदेशमे २६.४ प्रतिशत १५ से वा उहीसे ढेर उमेर समूहके महिला कौनो न कौनो हिँसा भोग्टी रहल बाटै ।

ओस्टके, सुदूरपश्चिम प्रदेशमे ८८.४ प्रतिशत किशोरी आपन भोजके उमेर अपनहे टोक्ना करल पाइल जनाइल बा । महिला सशक्तीकरणके लाग टमान नीति, नियम बन्लेसे फेन कार्यान्वयनके पाटो फितलो रहल यादवके बुझाइ रहल बा ।

यूरोपियन यूनियनके वरिष्ठ कार्यक्रम म्यानेजर शिव भण्डारी महिलाहे आर्थिक, सामाजिक रुपमे आघे बह्राइक लाग संघ, प्रदेश ओ स्थानीय तहसे लैङ्गिक समानता २०२१ से सम्बन्धित नीति रणनीति ओ कार्यक्रमहे कार्यान्वयनमे जोड डेहल रहिट ।

आइएलओके नेशनल प्रोजेक्ट अफिसर कृपा बस्नेत लैङ्गिक सामानताके लाग घरायसी कामके बाडफाँटमे जोड डेहल रही । उहाँ घरायसी कामकाजके बाडफाँट नैकरल ओरसे महिलाहुक्रे श्रमबजारमे आइ नैसेकल बटाइल रही । ओकर साथे उहाँ महिलाहे बेतलबी कामसे फेन तलबी काम ओर प्राथमिकता डेहे पर्ना बटाइल रही ।

ओस्टके, युनिसेफके बाल सुरक्षा अधिकृत उपमा मल्ल यौन हिंसाके शिकार हुइनामे डुई तिहाइ बालिका रहल उल्लेख करली । उहाँ लैङ्गिकतामे आधारित हिंसा पीडित साथे बालबालिकाके लाग एकद्वार संकट व्यवस्थापन केन्द्र ओसीएमसी, सुरक्षित आवास, आश्रय गृह, बाल हेल्पलाइन लगायत अन्य सेवामे पहुँच बह्राइ पर्ना बटाइल रही ।

महिला सशक्तीकरणके लागि संघ, प्रदेश ओ स्थानीय तह तिनु तहके सरकार आउर ढेर काम कैना आवश्यक रहल युएन वमन सुदूरपश्चिम प्रदेशके संयोजक प्रतिभा चौधरी बटैली । यकर लाग सञ्चार माध्यमसे फेन सरकारहे घचघच्याइना आवश्यक रहल उहाँके जोड रहे ।

कार्यक्रमके अन्य सहभागिहुक्रे फेन श्रमबजारमे महिलाके सहभागिता बह्राइ पर्ना, महिलासे नेतृत्व करल व्यवसायहे सहयोग करे पर्ना, कार्य क्षेत्रके वातावरण सुधार करे पर्ना, आय आर्जनके अवसर बह्रैना लगायतके माध्यमसे महिलाके आर्थिक सशक्तिकरणहे प्रवर्धनमे जोड डेहल रहिट ।

सशक्त महिला समृद्ध नेपाल, युनाइटेड नेसन नेपाल लगायतके संयुक्त आयोजनामे हुइल कार्यक्रममे संयुक्त राष्ट्र सङ्घीय जनसङ्ख्या कोषके प्रोग्राम म्यानेजर मञ्जु लामा, युएन वमनका सन्तोष आचार्य लगायत विषय विशेषज्ञके रूपमे आपन प्रस्तुति राखल रहिट ।