प्रदेश निजामती सेवा ऐन संशोधन ओ विज्ञापन स्थगनके माग

पहुरा समाचारदाता
धनगढी, २३ फागुन । थारू समुदायसे सुदूरपश्चिम प्रदेश निजामती सेवा ऐन संशोधनके माग करले बाटै ।

जनसङ्ख्या अनुसार समानुपातिक प्रतिनिधित्त्व हुइना मेरके आरक्षण कोटा बह्राइ पर्ना अडानसहित ऐन संशोधनके माग करल हो । ऐन संशोधनके मागसहित थारू ओ रानाथारू समुदायके अगुवा टमान समय आन्दोलन कैटी आइल बाटै । अगुवाहुक्रनके शुकके रोज बैठल बैठकसे प्रदेश लोकसेवा आयोगसे निकारल नवौं तहके विज्ञापन तत्काल स्थगन कैना समेत माग करले बाटै ।

धनगढीमे बैठल बैठकसे ऐन संशोधन ओ विज्ञापन स्थगनके माग कैटी थारू कल्याणकारिणी सभा कञ्चनपुरके सभापति सानु चौधरीके संयोजकत्वमे प्रदेश स्तरीय थारू÷रानाथारू आन्दोलन परिचालन समिति गठन करल बा ।

समितिसे तय करल आन्दोलनके कार्यक्रम शनिच्चरके पत्रकार सम्मेलन कैके सार्वजनिक कैना थारू कल्याणकारिणी सभा कैलालीके पूर्व उपसभापति माधव चौधरी जानकारी डेलै ।

ओस्टके, बैठकसे स्थानीय तहमे कार्यरत करारके कर्मचारीहे स्वतः स्थायी बनैना मेरके प्रदेश सरकारसे बनाइ लागल कानुनके विरुद्धमे उत्रल विद्यार्थीनके आन्दोलनप्रति ऐक्यबद्धता फेन जनाइल बा ।