चैतन्य पाठशालासे ११५ औँ अन्तर्राष्ट्रिय नारी दिवस मनाइल

पहुरा समाचारदाता
धनगढी, २४ फागुन । धनगढीमे रहल चैतन्य पाठशालासे ११५ औँ अन्तर्राष्ट्रिय नारी दिवसके अवसरमे चैतन्य आमा अभिभावकहुकनके लाग शुभकामना आदान प्रदान कार्यक्रम करले बा ।

कार्यक्रम अभिभावक तथा जेष्ठ नागरिक विष्णुदेवी थापाके सभाअध्यक्षतामे हुइल कार्यक्रममे प्रमुख अतिथि धनगढी उपमहानगरपालिकाके पुर्व उप प्रमुख शुसिला मिश्रभट्ट रहल रहिट । कार्यक्रममे बोल्टी उहाँ छावा छाईहे बराबर नजरसे हेरेपर्ना बटैली । घरके काम बाँडफाँड करलेसे केल महिला बाहेर काम कैना अवसर प्रदान हुइना बटैली । लर्कनहे मजा डगरमे दोह¥याइक लाग संस्कारसहित शिक्षा डेना आवश्यक रहल उहाँ बटैली ।

कार्यक्रममे विद्यालयके प्रिन्सिपल प्रेमनिधि ओझा जहाँ महिलाके सम्मान हुइना उहाँ देवताके बास हुइना बटैलै । एक महिला शिक्षित हुइलेसे समाज संसार शिक्षित हुइना बटैलै । कार्यक्रममे बोल्टी पाठशालाके अध्यक्ष गणेशप्रसाद जोशी चैतन्य पाठशालासे संस्कारसहितके शिक्षाहे वकालत करटी आइल बटैलै ।

उहाँ कहलै, ‘हम्रे बालबालिकासे ढेर नम्बर ल्यानल कलेसे क्षणिक रुपमे खुशी हुइठी मने ओइनके भिटर संस्कार बा की नैहो कना हेर्ना, मुल्याङकन कैना जरुरी बा ।’ कार्यक्रममे पाठशालाके पिटीए अध्यक्ष ईश्वर गिरी, पाठशालाके प्रिन्सिपल प्रेमनिधि ओझा, पिटीए सदस्य, शिक्षक, अभिभावक, पत्रकारहुकनके सहभागिता रहे । कार्यक्रममे विद्यार्थीनहे कविता सुनागैल रहे ।