कैलारीमे ११५औं अन्तर्राष्ट्रिय महिला दिवस मनागैल

नारी सम्मान आवश्यक बा, नारी रुक्लेसे संसार रुकीः गापा उपाध्यक्ष भगवती

पहुरा समाचारदाता
हसुलिया, २४ फागुन । कैलाली जिल्लाके कैलारी गाउँपालिकामे विविध कार्यक्रम कैटी भव्यताके साथ ११५औं अन्तर्राष्ट्रिय महिला दिवस मनागैल बा ।

वडा नम्बर १ हसुलियामे गाउँपालिका उपाध्यक्ष भगवतीकुमारी चौधरीके वरका पहुनामे पालिकास्तरीय अन्तर्राष्ट्रिय महिला दिवस मनागैल हो । कार्यक्रममे सम्बोधन करटी गाउँपालिका उपाध्यक्ष महिलाहुकनहे संविधानमे डेहल अधिकारहे केल्ह कार्यान्वयन करलेसे महिला आघे बह्रे पैना मौका मिल्ना बटैली ।

लैङिक विभेद अभिन कायम बा,’ गाउँपालिका उपाध्यक्ष कहली, ‘घरमे छावाछाईनहे डाईबाबासे विभेद कैना, छाई पटुहियाहे विभेद कैना चलन बा । महिलासे महिलाहे विभेद कैना चलन बा, महिलाहुकनहे जातीय, पितृसत्ता, वर्गीय, आर्थिक, सामाजिक कारणसे थप हिंसाके सामना करे परटी रहल बा ।’

उहाँ कहली, ‘डाई, छाई वा पटुहिया कोई हुइलेसेफे सक्कु जाने नारी हुइट । सम्मान चाहेक लाग सम्मान डेहे पर्ना उहाँ आग्रह करली ।’
महिलाहुकन उप्पर घरसे लेके सक्कु ओरके बोेझ रना मने आब चुल्ह चौकामे केल सिमित नैहो उप्पर उठेपर्ना जरुरी रहल उहाँ बटैली ।

११५ औ अन्तर्राष्ट्रिय महिला दिवसके टमान विधामे उत्कृष्ट योगदान कैना ओ उत्कृष्टता हासिल कैना व्यक्तिहुकनहे सम्मान ओ वक्तृत्वकला प्रतियोगिता ओ नृत्य डेखागैल बा । सम्मानित हुइलमे सामुदायिक विद्यालय ओर एसइई २०८० के परिक्षामे पालिका उत्कृष्ट नम्बर ल्यानके पास हुइल छात्रा लक्ष्मी माविके पत्रिका ढुङगाना ओ सस्थागत विद्यालय ब्राइटस्टार इगालिस बोर्डिङ स्कूलके क्रिस्टिना चौधरी रहल बटै । उहे अवसरमे शैक्षिक मुल्याङकन करके दिवसमे अवसरमे सामुदायिक विद्यालय लक्ष्मी मावि ओ संस्थागत विद्यालय कालिका इंगालिस बोर्डिङ स्कूलहे सम्मानपत्रसे सम्मानित कैगिल बा ।

महिलाके श्रमहे सम्मान कैटी महिला डकर्मी लक्ष्मी चौधरीहे सम्मानित हुइल बटी । गैल बरस लिला चौधरीहे सम्मान कैगिल रहे ।

ओस्टेक करके महिला स्वास्थ्य स्वय सेविका कमलादेवी चौधरी, आर्गनिक कृषि उपज उत्पादक कालीदेवी बोहराहे सम्मान कैगिल बा कलेसे वातावरणिय सरसफाई तथा स्वच्छता ओरसे योगदान पुगुइया पारदर्शि महिला विकास बहुउद्देश्यीय सहकारी सस्थाफे सम्मानित हुइल बा ।

कैलारी गाउँपालिका वडा नम्बर ३ के अध्यक्ष तथा सामाजिक विकास समिति संयोजक सन्तराम चौधरीके अध्यक्षतामे हुइल महिला दिवस कैलारी गाउँपालिका महिला तथा बालबालिका शाखाके आयोजनामे सहकार्य, समन्वय जनप्रतिनिधि सामाजिक क्षेत्रमे क्रियाशिल सहकारी, गैरसरकारी सस्थासे करल रहे ।

समन्वय करुइया संस्थामे ससक्त आवाज महिला संस्था, सहास नेपाल, थारु महिला संजाल, महिला उद्यमी संजाल, इन्सेक, इलाका प्रहरी कार्यालय, पारदर्शि महिला विकास बहुउद्देश्यी सहकारी सस्था लिमिटेड, ओरेक नेपाल, सेतो गुराँस बाल विकास, एकता नेपाल, शान्ति पुनस्र्थापना गृह, सामुदायिक विकास केन्द्र डोटी, यूनिसेफ फर एभरी चाइल्ड, याक नेपाल, डिडब्लुआरएफ, सामुदायिक विकास अध्ययन केन्द्र, समिक्षा महिला विकास बहुउद्देश्यी सहकारी, चेतनशिल महिला विकास बहुद्देश्यीय सहकारी, अ ल्याव नेपाल, एनडिडब्लुए, वडा महिला संजाल लगायत समन्वय करल रहिट । कार्यक्रमके सहजीकरण कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रहिट ।

ओस्टेक कैलारी गाउँपालिका वडा नम्बर ५ पवेरामे वडा अध्यक्ष विष्णु प्रसाद चौधरीके वरका पहुनामे वडा स्तरीय महिला दिवस मनागैल बा ।

चेतनशिल महिला विकास बहुद्देश्यीय सहकारी संस्था लिमिटेडके आयोजना तथा सामाजिक क्षेत्रमे कार्यरत टमान संघ सस्थाके समन्वय ओ सहकार्य करल रहे । कार्यक्रम आयोजक संस्थाके अध्यक्ष सुशिला चौधरीके अध्यक्षतामे हुइल रहे ।

विशिष्ट पहुना कैलारी गाउँपालिका उपाध्यक्ष भगवतीकुमारी चौधरी महिला दिवसके शुभकामना डेहल रही । कार्यक्रममे वडा सदस्य भागुदास चौधरी, अनारकली चौधरी, संचालन साना किसान सहकारीके प्रवन्धक गणेशी चौधरी करल रहिट । स्वागत मन्तव्य कृष्णा चौधरी करल रही । कार्यक्रममे टमान सहकारी, स्वास्थ्य संस्थाके प्रतिनिधि, भल्मन्साहुकनके सहभागिता रहे । कार्यक्रममे टमान गाउँसे सांस्कृतिक नृत्य ओ सचेतनामुलक नाटक डेखागैल रहे ।

ओस्टेक करके कैलारी गाउँपालिका वडा नम्बर ४ के गाउँमे वडा स्तरीय महिला संजालके अध्यक्ष तथा वडा सदस्य हरिद्वारी चौधरीके अध्यक्षतामे महिला दिवस मनागैल बा ।

कार्यक्रममे वरका पहुना गाउँपालिका उपाध्यक्ष भगवतीकुमारी चौधरी ओ विशिष्ट पहुना वडा अध्यक्ष ठागुराम चौधरी, कार्यपालिका सदस्य लालबहादुर चौधरी रहल रहिट । कार्यक्रममे वडा सदस्य मोहनलाल चौधरी, सोभा परियार, लक्ष्मी चौधरी, समन्वय स सहकार्य करुइया संस्था सहास नेपालके प्रतिनिधि, टमान टोलके भल्मन्सा, बुद्धिजिवीहुकनके सहभागिता रहे । कार्यक्रमके संचालन सविता चौधरी करल रही । कार्यक्रममे टमान टोलसे सचेतनामुलक नाँच डेखागैल रहे । कलेसे टमान मेरके प्रतियोगिताफे हुइल रहे ।

ओस्टेक करके वडा नम्बर ६ मे वडा स्तरीय महिला संजालके अध्यक्ष गौरी चौधरीके अध्यक्षतामे हुइल कार्यक्रममे बरका पहुना सुदूरपश्चिम प्रदेशसभा सदस्य रक्षा महरा ओ विशिष्ट पहुना कैलारी गाउँपालिका उपाध्यक्ष भगवतीकुमारी चौधरी, वडा नम्बर ६ के वडा अध्यक्ष प्रेमबहादुर चौधरी रहल रहिट ।

कार्यक्रममे कार्यपालिका सदस्य सुनिला चौधरी, वडा सदस्य गीता सुनार, महाविर चौधरी, फुलपाती चौधरीलगायत भल्मन्सा, टमान राजनितिक दलके प्रतिनिधि,बृद्धिजीविहुकनके हुकनके सहभागिता रहे । कार्यक्रमके संचालन पुष्पदेवी चौधरी करल रही । कार्यक्रममे सचेतनामुलक नृत्य प्रस्तुत कैगिल बा ।

ओस्टेक वडा नम्बर ९ के वडा स्तरीय महिला मानव अधिकार रक्षक संजालके अध्यक्ष दिलकुमारी चौधरीके अध्यक्षतामे हुइल कार्यक्रममे वरका पहुना वडा अध्यक्ष खेमराज चौधरी ओ विशिष्ट पहुना गाउँपालिका उपाध्यक्ष भगवतीकुमारी चौधरी रहल रहिट ।

कार्यक्रममे पहुना कार्यपालिका सदस्य जगमा चौधरी, वडा सदस्य धनबहादुर राना, शान्ति चौधरी, कृष्णी परियारटमान राजनितिक दलके प्रतिनिधि, टमान गाउँक भल्मन्सा, टमान सहकारी, संस्थाके प्रतिनिधिहुकनके सहभागिता रहे । कार्यक्रमके संचालन कल्सी चौधरी करल रही ।

ओस्टेक कैलारी गाउँपालिका वडा नम्बर ८ मे नारी दिवस कार्यक्रम संचालक समिति अध्यक्ष अनिता चौधरीके अध्यक्षतामे हुइल कार्यक्रममे वरका पहुना कैलारी गाउँपालिका उपाध्यक्ष भगवतीकुमारी चौधरी वरका पहुना रहल रहिट ।

कार्यक्रममे विशिष्ट पहुना वडा अध्यक्ष तारामल कठरिया, वडा सदस्य लक्ष्मी चौधरी, विजय चौधरी, भुमा परियार, नेपाली काँग्रेस कैलालीके उपसभापति खेमराज चौधरी, नेपाल थारु संघके केन्द्रीय सदस्य रामचरण चौधरी रहल रहिट ।

कार्यक्रममे गाउँपालिका उपाध्यक्ष महिला दिवसके शुभकामना डेटी महिलाहुकनहे संविधानहे डेहल अधिकार लेहक लाग पाछे नैपर्ना बटैली ।

नेपाल थारु संघके केन्द्रीय सदस्य रामचरण चौधरी महिलाहुकन कबु हिम्मत नैहारके आघे बह्रना शुभकामना डेहल रहिट । कार्यक्रममे वडा सदस्य भुमा परियार, विजय चौधरी, भल्मन्सा कलिराम चौधरी, समाजसेवी अमर थापा, रमिता बोहरालगायत मन्तव्य राखल रहिट । कार्यक्रमके संचालन जिनत महतो करल रही । ११५औं अन्तर्राष्ट्रिय महिला दिवसके अवसरमे हुइल कार्यक्रममे थारु गैरथारु समुदायके टमान मेरिक सास्कृतिक प्रस्तुती हुुइल रहे ।

ओस्टेक ११५औं अन्तर्राष्ट्रिय महिला दिवस कैलारी गाउँपालिका वडा नम्बर ३ ओ वडा नम्बर ७ मे भव्य कार्यक्रम करके मनागैल बा ।