कैलारीमे शारीरिक अपाङता परीक्षण घुम्ती शिविर सम्पन्न

पहुरा समाचारदाता
हसुलिया, २५ फागुन । कैलाली जिल्लाके कैलारी गाउँपालिका वडा नम्बर ३ टिसिएन डाँडामे शारीरिक अपाङता परीक्षण घुम्ती शिविर सम्पन्न हुइल बा ।

कैलारी गाउँपालिका, हसुलिया कैलाली तथा विकलाङ मित्र समूह÷अपाङ बाल अस्पताल तथा पुनस्र्थापना केन्द्र बनेपा, काभ्रेपलाञ्चोकसंगके संयुक्त आयोजनामे १८ वर्षसमके शारीरिक अपाङगता हुइल बालबालिकाके लाग स्वास्थ्य तथा पुनस्र्थापना घुम्ती शिविर संचालन हुइल रहे ।

शिविरमे ४६ जाने सेवा लेहल रहिट । जेम्ने जेम्ने २५ जाने लउण्डा २१ जाने लउण्डी रहल रहिट । ओइनके माइनर शल्यक्रिया कैगिल बा । ओम्ने मन्से ५ लउण्डा ओ १ लउण्डीके शल्यक्रियाके लाग भर्ना कैगिल अपाङ बाल अस्पताल तथा पुनस्र्थापना केन्द्रके सुदूरपश्चिम प्रदेश फोकल व्यक्ति राजाराम चौधरी जनैलै ।

स्वास्थ्य घुम्ती शिविर कैलारी गाउँपालिका उपाध्यक्ष भवगतीकुमारी चौधरीके वरका पहुनामे हुइल रहे । शिविरके उदघाटन करटी उहाँ अपाङता रहल व्यक्तिके उपचार करलेसे ठिक हुके टमान अवसर पैना बटैली । गाउँपालिकासे टमान विद्यालयमे अध्ययनरत रहल वडागत रुपमे परिक्षण करटी आइल ओअपाङगता विद्यार्थीके पहिचान करलेसे सेवा सुविधा डेना सहजुल हुइना ओ उपचार कैना सहजुल हुइना उहाँ बटैली ।

घुम्ती शिविरमे जन्मजात गोरके पैतला भिटर फर्कल (क्लब फुट), आगीसे डहके जंग एक आपसमे जोटल, गोड टुटके बाङ हुइल वा गोर लुल ओ कमजोर हुइलके चेकजाँच ओ उपचार हुइल बा ।

ओस्टेक करके ढाड बाङ वा कुप्रो हुइल जोर्नी ओ घुडाके पोग्रो खुम्चल, जोर्नी बठैना, सुवैना अवस्था, हडडी पाक्के पिप अइटी रना, हडडीके टि वि. रोग लग्ना, अंगरी अक्केमे जोरलके उपचार कैगिल बा ।

ओस्टेक शरीरके टमान जोर्नी बाङ वा खुस्कल, अन्य हाडजोडी सम्बन्धी समस्या रहल, जल्मटी ढाँड तथा तालु फाटल, गिजामे फोङग रहल, नाक बाङ हुइलके उपचार हुइल बा ।

स्वास्थ्य शिविरमे कैलारी गाउँपालिका स्वास्थ्य शाखा प्रमुख नरेशकुमार चौधरी, महिला तथा बालबालिका शाखा प्रमुख बालकुमारी चौधरी, स्वास्थ्यकर्मीहुकनके सहभागिता रहे ।