गेटामे नेपालके पहिल मेडिकल विश्वविद्यालयमे सञ्चालन हुईः प्रधानमन्त्री ओली
पहुरा समाचारदाता
धनगढी, २५ फागुन । प्रधानमन्त्री केपी शर्मा ओली यिहे वर्षसे नेपालके पहिल मेडिकल विश्वविद्यालय गेटमे सञ्चालनमे अइना बटैले बाट ।
सुदूरपश्चिम विश्वविद्यालयके अँटवारके रोज हुइलक पाँचौँ दीक्षान्त समारोहहे सम्बोधन कैना क्रममे उहाँ उ घोषणा करल रहिट । उहाँ मेडिकल विश्वविद्यालय स्थापनासँग नेपालमे चिकित्सा शिक्षाके पहुँच विस्तार हुके गुणस्तरीय अध्ययन कैना सहज हुइना बटैलै ।
उहाँ कहलै, यिहे बरस मेडिकलके पह्राई सुरु हुई, अस्पताल विना उ सम्भव नैरहल ओरसे मेडिकल कलेज ओ अस्पताल संगे संचालनमे आई । सुदूरपश्चिम प्रदेश पाछे रहल कहटी आब ओसिन परिचय बडले पर्ना अवस्था रहल टिप्पणी करलै ।
यी सुन्दर केल नाही सम्भावनासे भरल समृद्ध बने सेक्ना प्रदेश हो । पाछे परल प्रदेश कना परिचय आब बडले परल दीक्षित हुइटी करल विद्यार्थीहे सम्बोधन करटी उहाँ कहलै, ‘नयाँ पुस्तासे देशमे सम्भावनाके खोजी करे परठ ।’
दक्ष जनशक्ति निर्माणमे विश्वविद्यालय लागेपर्ना उहाँक कहाई रहे । दार्चुला उत्तरी क्षेत्रसम पुग्न सकस हुइल कहटी छाङग्रुसम पुग्न सडक निर्माण सुरु करल बटैलै ।
‘अब्बे पाँच करोड विनियोजन करले बटी । पारीके डगरसे जाईबेर नेपालीहुक्रे दुःख पैले बटै । अब्बे गोरेटो डगर निकारलपाछे पक्की सडकके लाग बजेट विनियोजन करके तक्लाकोटसम जैना डगर बनैबी,’ उहाँ कहलै ।
पञ्चेश्वर परियोजनाके आघे बह्रैना भारतसँग छलफल हुइटी रहल प्रधामन्त्री ओली बटैलै । अपने प्रधामन्त्री हुईबेर मुलुकमे विकाससे गति पैटी रहल उहाँक कहाई रहे । हुलाकी सडक, दोधारा चाँदनी औद्योगिक क्षेत्र, सुख्खा बन्दरगाह निर्माण प्रारम्भ करल प्रधामन्त्री ओली बटैलै ।
सुदूरपश्चिम देव भूमि रहल कहटी उहाँ यहाँके मोठमंदिर, धार्मिक क्षेत्र पौराणिक क्षेत्र सक्कुके महत्व रहल बटैलै ।
