कैलारीमे नैसर्ना रोगके चेकजाँच शिविर सुरु
पहुरा समाचारदाता
हसुलिया, २८ फागुन । कैलाली जिल्लाके कैलारी गाउँपालिकासे सक्कु वडामे रहल स्वास्थ्य संस्थासे नैसर्ना रोग पहिचानके लाग स्वास्थ्य शिविर सुरु करले बा ।
कैलारी गाउँपालिका स्वास्थ्य शाखाके आयोजनामे सक्कु वडामे रहल स्वास्थ्य संस्थासे नैसर्ना रोगके पहिचान तथा सचेतना अभियान सुरु कैगिल हो ।
गाउँपालिका मातहतके ९ स्वास्थ्य संस्थामे ३० वर्ष उप्परके सक्कु नागरिकहुकनके नैसर्ना रोगके जोखिम पहिचान (चेकजाँच) तथा सचेतना ओ स्वास्थ्य शिक्षा डेटी रहल स्वास्थ्य शाखा प्रमुख नरेशकुमार चौधरी जनैलै ।
सक्कु स्वास्थ्य संस्थामे दुई हप्तासम संचालन रना स्वास्थ्य शिविरमे रगतमे मधुमेह रोगके परिक्षण, रगतमे प्रोटिनके जाँच, रक्त चाप परिक्षण, मधुमेह, उच्च रक्तचाप, क्यान्सर, मृगौला रोग, मुटु रोग सम्बन्धी परामर्श सेवा प्रदान ओ उचाई अनुसार शारिरिक तौलके जाँच हुइटी रहल उहाँ जनैलै ।
