मर्यादित रुपमे ढुरहेरी मनैना आग्रह
पहुरा समाचारदाता
धनगढी, २८ फागुन । जिल्ला प्रशासन कार्यालय कैलालीसे ढुरहेरी (होली) फागु पूर्णिमा सभ्य ओ मर्यादित रूपमे मनैना आग्रह करले बा ।
इहे चैत १ गते परल टिहुवारहे व्यवस्थित बनैना प्रशासनसे टमान निर्देशन जारी करल हो । प्रशासनसे ढेरहेरीके नाउँमे अवाञ्छित गतिविधि नैकैना सक्कु जनहनहे सचेत करले बा । जथाभावी रंग लगैना, हानिकारक बस्तु लगैना, प्लास्टिकजन्य लोला तथा पानी ओहद्ना, मादक पदार्थ सेवन कैके सवारी चलैना, डगरामे नेंगुइया व्यक्तिहे दुव्र्यवहार कैना, डोरीसे डगरा छेकके पैसा उठैना, सवारी साधन रोकके रकम असुल्ना जैसिन कार्यहे प्रतिबन्ध लगाइल बा ।
इ बरस रात ९ बजेसम किल होली मनैना अनुमति डेहल बा । इ सीमा उल्लंघन कैलेसे कानूनी कारबाही हुइना जिल्ला प्रशासन कार्यालय चेतावनी डेले बा ।
सहायक प्रमुख जिल्ला अधिकारी किरण जोशीसे जारी सूचनामे ढुरहेरी टिहुवारहे सभ्य, मर्यादित ओ हर्षोल्लासपूर्ण रूपमे मनैना सक्कु कैलालीवासीहे अनुरोध करल बा ।
