धनगढी–१६ मे एकिकृत महिला स्वास्थ्य शिविर सम्पन्न
पहुरा समाचारदाता
धनगढी, २९ फागुन । कैलालीके धनगढी उपमहानगरपालिका वडा नं १६ घसिटामे धनगढी उपमहानगरपालिकाके स्वास्थ्य शाखाके आयोजनामे महिला पुनस्र्थापना केन्द्र (ओरेक सगके सहकार्यमे एकिकृत महिला स्वास्थ्य शिविर सम्पन्न हुइल बा ।
निशुल्क शिविरमे महिलाहुकनके आङ खस्न (पाठेघर खसल) समस्याके पहिचान, रिंगपेसरी सेवा एवं यौनजन्य संक्रमणके लाक्षणिक उपचार सेवा ओ बच्चा पासेकल विवाहित तथा प्रौढ उमेरके महिलाहुक्रे प्रजनन् स्वास्थ्य समस्या हुइल किशोरीहुकनके लाग एकिकृत महिला स्वास्थ्य शिविर हुइल हो ।
उ शिविरमे १५६ जाने महिला तथा किशोरीहुकनहे लैंगिक हिंसा, महिला तथा किशोरीहुकनके प्रजनन स्वास्थ्यके कारण, उपचार, घरेलु जडिबुटीके प्रयोग लगायत विषयमे अभिमुखीकरण कैगिल ओरेक नेपालके जिल्ला संयोजक गीता चौधरी जनैली ।
महिलाहुक्रे अपन समस्या खुलके राखे सेक्ना वातावरण तयार कैना तथा महिलाहुकनके प्रजनन स्वास्थ्य समस्याके कारणके विश्लेषण कैना उदेश्यले मनोविमर्शकर्तासे सयपत्री बाटचित कैगिल उहाँ जनैली ।
शिविरमे ९९ जानेक पाठेघरके मुखके क्यान्सरके जाँच, महिला स्त्री रोग बिशेषज्ञसे निःशुल्क जाँच, परामर्श ओ समस्या अनुसारके निःशुल्क औषधी, १० जाने पाठेघर खसल महिला मध्ये ६ जानेक रिङ पेसरी राखल ओ २० जानेक एसटीआई ओ ३ जानेक पोल्याप सम्बन्धी समस्याके व्यवस्थापन करल संयोजक जनैली ।
कार्यक्रमके उदघाटन धनगढी उपमहानगरपालिका वडा नं १६ के वडा अध्यक्ष रामलाल चौधरी करल रहिट । महिला स्वास्थ्य शिविरमे स्वास्थ्यकर्मी, महिला स्वास्थ्य स्वयं सेविका, महिला भल्मन्सा, मनोविमर्श कर्ताहुकनके सहभागिता रहे ।
