छैठौं कठरिया साँस्कृतिक होरी महोत्सव
‘आरक्षणके मुद्दामे प्रदेश सरकार गम्भीर नैहो’
पहुरा समाचारदाता
धनगढी, २९ फागुन । कैलालीके जानकी गाउँपालिका ४ मुनुवामे छैठौं राष्ट्रिय कठरिया साँस्कृतिक होरी महोत्सव २०८१ निम्जल बा । कठरिया समाज नेपालके आयोजना तथा मुनुवा गाउँ समाजके सह–आयोजनामे होरी महोत्सव हुइल हो ।
कठरिया समाज नेपालके अध्यक्ष दुखीराम कठरियाके अध्यक्षतामे हुइल हुइल कार्यक्रममे सुदूरपश्चिम प्रदेश सरकारके पूर्वमन्त्री माननीय कैलाश चौधरी वरका पहुना ओ जानकी गाउँपालिका अध्यक्ष गणेश चौधरी विशिष्ट पहुना रहिट ।
उदघाटन समारोहमे सम्बोधन करटी पूर्वमन्त्री चौधरी आरक्षणके मुद्दामे प्रदेश सरकार गम्भीर नैरहल, थारु समुदायके प्रतिनिधत्व सहि रूपमे नैकराइल बटैलै ।
प्रदेशमे जनसंख्या अनुसार थारु जनप्रतिनिधि तथा विभागमे उचित स्थान नैडेहल, भारी दल संघियता लागु कैनाप्रति गम्भीर नैरहल कारण संघियता संकटमे रहल बाट प्रष्ट परलै । सुदूरपश्चिम प्रदेशमे थारु समुदाय अब्बे आन्दोलनमे रहल ओरसे सक्कु थारु एकजुट हुके समानुपातिक प्रतिनिधित्वके लाग संघर्ष करेपर्ना उहाँ बटैलै ।
महोत्सवमे कठरीया समाज नेपालसे पूर्वमन्त्री माननीय कैलाश चौधरीहे पाँच बुँदे ज्ञापनपत्रफे बुझागिल बा । जेम्ने अर्धनिर्मित कठरिया संग्राहलय निर्माणके लाग अवश्यक बजेट व्यवस्थापन कैना अनुरोध कैगिल बा । सुदूरपश्चिम प्रदेश सरकारके आर्थिक सहियोगमे कैलारी गाउँपालिका वडा नं.–८ स्थित लौसा गाउँमे निर्माणके प्रक्रियामे रहल कठरिया संग्राहलयहे पुर्ण रुपमे निर्माण सम्पन्न करेक लाग आवश्यक आर्थिक बजेट व्यवस्थापन कैना माग कैगिल बा ।
बहुउद्देश्य प्रयोजनके लाग सभाहल निर्माणके लाग पहल कैडेना, सीप मुलक तालिम, सभा समारोह लगायत टमान प्रायोजनके लाग कैलाली जिल्लाभिटर कठरिया गाउँमे एक ठो सभाहल निर्माणके लाग आवश्यक आर्थिक बजेट व्यवस्थापन कैना डेना माग कैगिल बा ।
कठरिया समुदायमे बजैना परम्परागत मौलिक बाजा संरक्षण कैना आवश्यक कार्यक्रम मौलिक बाजा बनैना तथा बजैना सीप मुलक तालिम संचालन कैना आवश्यक आर्थिक बजेट व्यवस्थापन कैडेना माग करल बा ।
बाहिरी प्रभाव लगायत टमान कारणसे कठरिया भाषा लोप हुइना अवस्थामे पुगल बा । टबमारे कठरिया भाषा बचैना यी समुदायके जाती तथा भाषाहे सुचिकृतके लाग अवश्यक पहल करडेना माग करल बा ।
प्रादेशिक सरकारके रेडियो नेपाल सुदुरपश्चिम क्षेत्रीय प्रसारणमे कठरिया भाषामे कार्यक्रम तथा समाचार प्रसारणके व्यवस्था मिलाडेना पूर्वमन्त्री माननीय कैलाश चौधरीमार्फत मुख्यमन्त्रीहे हार्दिक अनुरोध कैगिल बा । कठरिया समुदायके माग मुद्दा मुख्यमन्त्रीहे बुझैना माननीय कैलाश चौधरी बटैलै ।
कार्यक्रममे जानकी गाउँपलिका उपाध्यक्ष लालमति रावत कठरिया, मानबहादुर कठरियालगागत वडाध्यक्षहुक्रे शुभकामना मन्तव्य व्यक्त करल रहिट । स्वागत मन्तव्य व्यक्त कठरिया समाजके उपाध्यक्ष गीता कठरिया राखल रही ।
होरी महोत्सवमे तपा गाउँके आधुनिक होरी, मुनुवा, लक्कड गाउँके –बन्ना नाच÷भगतुवा नाँच, लौसा पवेरा, डहरविरिया, सिमरी गाउँके कलाकार होरी, चररा, सिसैया गाउँके मिचुवा होरी, तपा गाउँके आधुनिक कलाकार होरी, राष्ट्रिय गायक रमेश मिसन, रामकुमार कठरिया, मनमति बखरियालगायतके राष्ट्रिय तथा स्थानीय ख्याति प्राप्त कलाकारहुकनके प्रस्तुति रहल रहे ।
