ढुरहेरीसे एकआपसमे प्रेम, बन्धुत्व ओ एकता बलगर होएः प्रदेश प्रमुख मियाँ
पहुरा समाचारदाता
धनगढी, २९ फागुन । सुदूरपश्चिम प्रदेश प्रमुख नजिर मियाँ ढुरहेरी (होली) सक्कु नेपालीबीच आपसी प्रेम बन्धुत्व ओ एकताके भावना बह्राके लावा उमङ्ग ओ हौसलाके साथ मुलुकके प्रगतिमे अग्रसर हुइना कामना करले बाटै ।
फागु पूर्णिमा (होली)के अवसरमे शुभकामना सन्देश डेटी प्रदेश प्रमुख मियाँ पर्वसे आपसी सद्भाव ओ एकताहे बलगर बनैना बटाइल हुइट । प्रदेश प्रमुख मियाँ अइसीन पर्वसे टमान जातजाति ओ समुदायके अपने मौलिक संस्कृति ओ परम्पराके संरक्षण, संवद्र्धन ओ विकासमे टेवा पुग्ना विश्वास व्यक्त करले बाटै ।
‘अइसीन पर्वसे टमान जातजाति ओ समुदायके आपन मौलिक संस्कृति ओ परम्पराके संरक्षण, संवद्र्धन ओ विकासमे टेवा पुगैनाके साथे एक आपसमे आपसी प्रेम सद्भाव ओ आत्मीयता अभिवृद्धि कैटी जैना अपेक्षा करले बाटु’ प्रदेश प्रमुखसे जारी करल शुभकामना सन्देशमे उल्लेख करल बा, ‘इ पर्वसे सक्कु नेपालीबीच आपसी प्रेम बन्धुत्व ओ एकताके भावना बह्राके लावा उमङ्ग ओ हौसलाके साथ मुलुकके प्रगतिमे अग्रसर हुइना प्रेरणा प्रदान कैना कामना करटुँ ।’
सांस्कृतिक विविधतासे भरल मुलुकमे असत्यउपर सत्यके अन्यायउपर न्यायके ओ दुराचारउपर सदाचारके विजय हुइल खुसीयालीमे फागु पूर्णिमा मनाजैना करल उल्लेख कैटी उहाँ एक आपसमे रिसराग परित्याग कैके प्रेम भाव ओ आत्मीयताके साथ सुखी एवम् हर्षाेल्लासपूर्वक आफन्त ओ संघरियनसे अबिर तथा रङ्ग लगाके ढुरहेरी खले पर्ना बटैले बाटै ।
नेपाली समाजमे मनाजैना विविध सांस्कृतिक तथा ऐतिहासिक महत्वके टरटिहुवार मध्ये फागु पर्व एक विशिष्ट पर्व हो । पहाडमे पहिल दिन ओ तराई–मधेसमे ओकर डोसर सकारे मनाजैना इ टिहुवारहे मधेस प्रदेश ओ विशेष कैके मिथिला क्षेत्रमे महत्वके साथ मनैना करजाइठ् । परिवार, आफन्तजन, संघरियन जम्मा होके एकऔरे जनहनमे विविध रङ लगाके, टीका लगाके सांस्कृतिक सद्भाव ओ सामाजिक सम्बन्ध गाढा बनैना महत्त्वपूर्ण पर्वके रूपमे ढुरहेरी मनैना करजाइठ् ।
