लागु औषधसहित ६ जाने पक्राउ
पहुरा समाचारदाता
धनगढी, ३ चैत । कैलाली ओ कञ्चनपुरके अलग अलग ठाउँसे लागु औषधसहित ६ जाने पक्राउ परल बटै ।
कैलालीके धनगढी उ.म.न.पा. ३ त्रिनगर ब्यारेलस्थित भारतसे नेपालओर अइटी रहल सु.प.प्र. ०१–०१२ प ५४७५ नम्बरके मोटरसाइकलहे शंका लागके चेकजाँच करेबेर चालक वडा नम्बर ६ बैठना बर्ष २८ के आदित्य रानाहे २ ग्राम ८६० मिलिग्राम लागुऔषध खैरो हेरोइनसहिट पक्राउ कैगिल बा । जिल्ला प्रहरी कार्यालय कैलालीसे खटल प्रहरी टोली नियन्त्रणमे देके ठप अनुसन्धान कैटी रहल बा ।
ओस्टेक लागु औषध खैरो हेरोईनके कारोबार हुइटी रहल कना गोप्य सूचनाके आधारमे जिल्ला कैलाली, घोडाघोडी न.पा. ७ हरिनगर स्थित बर्ष २५ के लक्ष्मण चौधरीके घर कोठा खानतलासी करेबेर १५ ग्राम ६० मिलिग्राम लागुऔषध खैरो हेरोइनसहित घरधनी लक्ष्मण चौधरी, उहे ठाउँ बैठना २५ के राम चौधरी, बर्ष २७ के दुर्गेश चौधरी ओ जिल्ला रुपन्देही, बुटवल उप–महानगरपालिका ३ बैठना बर्ष ३५ के रमेश कार्की समेत चारु जनहनहे उ पदार्थ सहित इलाका प्रहरी कार्यालय सुखड ओ अस्थायी प्रहरी पोष्ट हरिनगर, कैलालीसे खटल संयुक्त प्रहरी टोली नियन्त्रणमे लेके ठप अनुसन्धान करटी रहल जिल्ला प्रहरी कार्यालय कैलालीके प्रवक्ता कविन्द्रसिह बोहरा जनैलै ।
ओस्टेक करके कञ्चनपुरके दोधारा चाँदनी न.पा.१ पशुपति टोल शिव मन्दिर लग्गेसे ३.६७० ग्राम लागुऔषध खैरो हेरोइनसहित बेदकोट न.पा.७ बैठना बर्ष २१ के प्रभाष शाही पक्राउ परल बटै ।
नेपाल प्रहरी प्रदेश कार्यालय महेन्द्रनगर, लागु औषध नियन्त्रण ब्युरो शाखा कार्यालय महेन्द्रनगर, इलाका प्रहरी कार्यालय दोधारा चाँदनी ओ अस्थायी प्रहरी पोष्ट झोलुङ्गे, कञ्चनपुरसे संयुक्त रुपमे खटल प्रहरी टोलीसे नियन्त्रणमे लेके ठप अनुसन्धान करटी रहल बा ।
