अध्यक्ष रनिङ कपके ट्रफी वडा कार्यालयहे हस्तान्तरण
पहुरा समाचारदाता
हसुलिया, ४ फागुन । कैलारी गाउँपालिका स्तरीय छैठौं अध्यक्ष रनिङ कप २०८१ खेलकुद प्रतियोगिताके विजेता खेलाडीहुक्रे वडा नम्बर ३ के कार्यालयहे ट्रफी (शिल्ड) हस्तान्तरण करले बटै ।
कैलारी गाउँपालिका वडा नम्बर ३ के विजेता खेलाडीहुक्रे सोम्मारके रोज कार्यालय पुगके वडा अध्यक्ष सन्तराम चौधरीहे ट्रफी (शिल्ड) हस्तान्तरण करल रहिट ।
कैलारी यूथस यूनाईटेड क्लव ओ कैलारी फुटवल संघके संयूक्त आयोजना तथा कैलारी गाउँपालिकाके मुख्य प्रवद्र्धकमे हुइल उ प्रतियोगितामे वडा नम्बर ३ फुटवल खेलमे पहिल स्थान हासिल करके नगद रु ५० हजार ओ ट्रफी (शिल्ड) हासिल करल रहे ।
कैलारी गाउँपालिका–३ स्थित यौङ व्वाइज क्लवके खेल मैदानमे हुइल प्रतियोगितामे आपन प्रतिस्पर्धी वडा नम्बर ४ के खेलाडीहुकनके हरैटी वडा नम्बर ३ विजेता बन्ना सफल हुइल रहे । कलेसे उपविजेता वडा नम्बर ४ हुइल रहे ।
विजेता खेलाडीनसे बुझाइल ट्रफी (शिल्ड) ग्रहण करटी वडा अध्यक्ष सन्तराम चौधरी वडा नम्बर ३ के खेलाडीहुक्रे यी वडाके शिर उच्च बनाइल कहटी खुशी व्यक्त करलै ।
उहाँ कहलै, पालिकास्तरीय खेलकुदमे खेलाडीहुक्रे मजा खेलमे प्रदर्शन करके विजयी हासिल करलै । जिल्ला स्तरीय, प्रदेश स्तरीय ओ राष्ट्रिय प्रतियोगिताहे अस्टे जिट हासिल करटी गैलेसे वडा कार्यालयसे हुइना सहयोगमे कमी नैरख्ना उहाँ बटैलै ।
वडा नम्बर ३ के वडास्तरीय खेलकुड समन्वय समिति संयोजक भिखराम चौधरी, सचिव दिगम्बर चौधरी, समितिके सल्लाहकार अमृतचन्द्र चौधरीलगायत खेलाडीहुक्रे सहभागीहुके ट्रफी (शिल्ड) बुझाइल रहिट ।
