धनगढीमे जारी सीप तथा रोजगार मेला सम्पन्न

पहुरा समाचारदाता
धनगढी, १५ चैत । धनगढी उपमहानगरपालिका वडा नम्बर १ के खुला मञ्चमे जारी सीप तथा रोजगार मेला सम्पन्न हुइल बा ।

धनगढी उपमहानगरपालिकाके आयोजनामे सञ्चालित उ मेला शुकके रोज एक कार्यक्रमके बिच सम्पन्न हुइल हो । मेलामे सहभागी प्रशिक्षार्थी ओ प्रशिक्षकहुकनहे प्रमाण–पत्र हस्तातरण करटी मेलाके समापन हुइल रहे ।
कार्यक्रममे प्रमुख अतिथी तथा उपप्रमुख कन्दकला राना सीप तथा रोजगार मेलासे अपनमे आत्मानिर्भर केल्ह नाही आत्माबल समेत बह्रल बटैली । उहाँ मेलासे उपमहनगरपालिकाके केल नैहुके सुदूरपश्चिमके आर्थिक समृद्धि हुइल बटैली ।

अब्बे कयौँ युवा विदेश पलायन हुइटी रहल बेला मेलासे उपमहनगरपालिका प्रति आर्कषण समेत बह्रल उहाँ बटैली ।
मेलासे उपमहनगरपालिकाके भारी महत्वपूर्ण विकास ओ योजना सफल हुइल उहाँ बटैली । उहाँ आग्रामी वर्षमेफे मेलाहे निरन्तरता डेना बटैली ।

उपमहानगरपालिकासे फागुन ८ गतेसे सञ्चालित टमान आठ विधामे २९ मेरिक तालिम सुदूरपश्चिमके नौ जिल्लाके ३९ स्थानीय तहके युवाहुकनहे सीप तालिम प्रदान करल रहे । तालिममे सहभागी हुइलमे पाँच सय ७० जाने पुरुष ओ चार सय ७० जाने महिला बटै ।

तालिमके लाग सुदूरपश्चिमके ८८ स्थानीय तहसे आवेदन डेहलमे चार हजार आठ सय ३० जानेमध्ये अन्तिम छनौटमे परल एक हजार ४० जाने युवाहुक्रे सीप सिखल हुइट ।

छनौट हुइल युवाहुकनहे तालिम अवधि भर एक महिना सीप तालिम डेहल रहे । सीप तथा रोजगार मेलामे मोबाइल तथा सीसीटीभी मर्मत, बिल्डिङ इलेक्ट्रिकल, एसी तथा रेफ्रिजेरेटर मर्मत, अटो क्याड, हार्डवेयर नेटवर्किङ, ग्राफिक्स डिजाइनिङ, डिजिटल मार्केटिङ, पुरोहित तालिम, इसीडी वालविकास शिक्षक, फेसन डिजाइन, एडभान्स टेलरिङ, हेयर कटिङ तथा स्टाइलिङ, नाई (बार्बर), एडभान्स ब्युटिसियन, प्लम्बिङ, वेल्डिङ, इलेक्ट्रिक भेहिकल (ईभी) मर्मत तथा लेखा व्यवस्थापन तालिम सञ्चालन करल रहे ।

ओस्टेक करके सांस्कृतिक पोसाक निर्माण, बेतबाँस क्राफ्ट, टायल तथा मार्बल फिक्स्चर, डकर्मी, मोटरसाइकल तथा स्कुटर मर्मत, रिसेप्सनिष्ट, वेटर, कफी बारिस्टा, हाउस पेन्टिङ, फर्निचर तथा फास्टफुड कुकिङ तालिम सञ्चालन करल रहे । सीप तथा रोजगार मेलाका लागि दुई करोड ५० लाख रुप्या खर्च हुइल उपमहानगरपालिका जनैले बा ।