पत्रकार हत्या ओ मिडियाउपर आक्रमण करुइयाहे कारबाहीके माग
पहुरा समाचारदाता
धनगढी, १६ चैत । पत्रकार सुरेश रजकके हत्या ओ मिडिया गृहउपर आक्रमण करुइयाहे कानुनी कारबाही कैना माग कैटी पत्रकार धनगढीमे विरोध प्रदर्शन करले बाटै ।
नेपाल पत्रकार महासंघ कैलाली शाखाके आयोजनामे विरोध प्रदर्शन करल हो । घटनाके भत्र्सना कैटी पत्रकार दोषीहे कारबाही कैना माग करले बाटै । हत्याके विरोधमे पत्रकार धनगढीके ट्राफिक चौराहासे बसपार्कसम विरोध प्रदर्शन करल रहिट । उ प्रदर्शन ट्राफिक चौराहा पुगके विरोधसभामे परिणत हुइल रहे ।
शुकके काठमाडौँके तीनकुनेस्थित एक घरमे आगी लगाके पूर्व राजावादी आन्दोलनकारी पत्रकार रजकहे जिट्टी जराइल रहिट । ओस्टके, टमान सञ्चारगृहमे तोडफोड करल रहे । आन्दोलनके नाउँमे अराजक जत्थासे नियोजित रूपमे पत्रकारके हत्या ओ सरकारी तथा व्यक्तिगत सम्पत्ति तोडफोड करल नेपाल पत्रकार महासंघ सुदूरपश्चिम प्रदेशके अध्यक्ष भरत शाह बटैलै । उहाँ मागके नाउँमे अराजकता फैलैना कुहीहे छुट नैरहल उल्लेख करलै ।
ओस्टके, नेपाल प्रेस युनियनके सुदूरपश्चिम अध्यक्ष मनमोहन स्वाँर तीनकुने घटना सुनियोजित रहल बटैलै । उहाँ लोकतन्त्रउपर नै आघात कैना प्रयास हुइल कहटी उ विरुद्ध एकजुट हुइना ओ लोकतन्त्र रक्षाके लाग कलम चलैना पत्रकारहे आग्रह करल रहिट । राजा फर्कैना नाउँमे शुकके करल प्रदर्शन अराजक रहल स्वाँरके कहाइ रहे ।
ओस्टके, इन्सेकके सुदूरपश्चिम प्रदेश संयोजक खडकराज जोशी राष्ट्रिय मुद्दा ओ नागरिकके अधिकारके सवालमे सक्कु जाने एक हुइना आवश्यक रहल बटैलै । पत्रकारके आन्दोलनमे ऐक्यबद्धता जनैटी उहाँ तीनकुने घटना पत्रकारउपर किल नैहोके आम नागरिकउपरके आक्रमण रहल स्पष्ट पारल रहिट । उहाँ जनताके बलिदानीसे प्राप्त लोकतन्त्रके रक्षा कैना आवश्यक रहल उल्लेख करलै ।
विरोध सभाहे नेपाल पत्रकार महासंघके पूर्व केन्द्रीय सदस्य मीन बम, कैलालीके पूर्व अध्यक्ष दीर्घराज उपाध्याय, प्रेस चौतारीके जिल्ला अध्यक्ष जनक विष्ट, नेपाल आदिवासी जनजाति पत्रकार महासंघके प्रदेश अध्यक्ष उन्नती चौधरी, प्रेस सेन्टरके जिल्ला सचिव राम दहित, समाजवादी प्रेस सङ्गठनके जगत जैगडी लगायत सम्बोधन करल रहिट ।
