कैलारीमे बोण्ड स्कुल पालिकास्तरीय बोर्ड परीक्षामे उत्कृष्ट
पहुरा समाचारदाता
धनगढी, २९ चैत । कैलारी गाउँपालिका वडा नम्बर ५ पवेरामे रहल बोण्ड इङलिस बोर्डिङ स्कुल गाउँपालिका स्तरीय बोर्ड परीक्षामे उत्कृष्ट विद्यालय हुइना सफल हुइल बा ।
गाउँपालिका स्तरीय बोर्ड परीक्षामे बोण्ड इगलिस बोडिङ स्कुल ९१ प्रतिशत विद्यार्थी पास हुइल बटै । बोण्ड इगलिस बोर्डिङ स्कुलसे २२ जाने सहभागी परिक्षार्थी मध्ये २० जाने पास हुइल सस्थापक प्रिन्सिपल तिलक बोहरा बटैलै । उहाँ ३.९० जिपिए ल्यानके आर्जु बोहरा गाउँपालिका टप हुइल बटैलै ।
विद्यार्थीनहे २१औं शताब्दीके व्यवहारिक, प्रयोगात्मक तथा सैद्धान्तिक शिक्षा प्रदान कैना उद्देश्यसे २०६४ सालमे स्थापना हुइल विद्यालय हरेक बर्ष उत्कृष्ट नतिजा डेटी आइल बोहरा बटैलै ।
गतिशील तथा अनुभवी व्यक्तिहुकनके समूहसे सञ्चालनमे ल्यानल यी विद्यालयमे हाल ६ सयसे ढेर विद्यार्थी रहल उहाँ जानकारी डेलै । बोहरा ग्रामीण क्षेत्रमे सञ्चालित विद्यालयसे विद्यार्थीके सुन्दर भविष्यके गोरेटो कोर्न काम करटी रहल जानकारी डेलै ।
जीवनमे अइना टमान चुनौतीके सामना करटी भविष्यहे सफल तथा समृद्ध बनैना ज्ञान तथा सीप प्राप्त कैना उत्कृष्ट उदेश्यके साथ अइना दिनमेफे विद्यालय सदा अग्रसर रही । बोहरा कहलै कुछ बाट सिख्ना जीवनमे सकारात्मक परिवर्तन ल्यन्ना हो, यिहे उद्देश्य पूरा कैना उ विद्यालयसे विद्यार्थीके अन्तर्निहीत क्षमता तथा प्रतिभाके पहिचान करके आत्मनिर्भरता अनुशासन ओ सर्मपणके विकास करटी रहल बा । अन्तर्राष्ट्रिय स्तरमे प्रतिस्पर्धा करे सेक्ना विद्यार्थी बोण्ड स्कुलसे उत्पादन करटी रहल प्रिन्सिपल बोहरा बटैलै ।
