सचिव सुवेदीहे कारवाहीके माग कैटी विरोधपत्र
पहुरा समाचारदाता
धनगढी, २१ वैशाख । सुदूरपश्चिम प्रदेश सरकार, मुख्यमन्त्री तथा मन्त्रिपरिषदके कार्यालयके कानून सचिव लिलाधर सुवेदीहे कारवाहीके माग कैटी मुख्यमन्त्रीहे विरोध पत्र बुझाईल बावे । नेपाल पत्रकार महासंघ प्रदेश समितिसे अँट्वारके कार्यवाहक मुख्यमन्त्री बहादुर सिंह थापाहे विरोधपत्र बुझाइल हो ।
‘सुदूरपश्चिम प्रदेश सरकार, मुख्यमन्त्री तथा मन्त्रिपरिषदके कार्यालयके कानून सचिव लिलाधर सुवेदी विश्व प्रेस स्वतन्त्रता दिवस (३ अप्रिल, २०२५) के दिन समग्र पत्रकारिता क्षेत्र, मिडिया हाउस ओ सञ्चारकर्मीनके अपमान कैटी सामाजिक सञ्जालमे लिखल स्टाटसप्रति नेपाल पत्रकार महासंघ सुदूरपश्चिम प्रदेश समिति घोर आपत्ति व्यक्त करटी’ प्रदेश अध्यक्ष भरतबहादुर शाहसे हस्ताक्षरित विरोधपत्रमे उल्लेख बा ।
कानूनसचिव सुवेदी सामाजिक सञ्जालमे काठमाडौंसे प्रकाशन हुइटी रहल अन्नपूर्ण पोस्ट राष्ट्रिय दैनिक ओ धनगढीके ईविगुल डटकमके समाचार लिंक सेयर कैटी ‘पैसा लेके समाचार लिखुइया पत्रकार ओ मिडिया हाउसहे फेन प्रेस स्वतन्त्रता दिवशके शुभकामना’ कहटी स्टाटस लिखल रहिट ।
‘आपन बारेम प्रकाशित समाचारके विषयमे विमति रलेसे कानूनी उपचार खोज्नाके सट्टा समग्र पत्रकारिता क्षेत्रहे नै अपमान कैटी आक्षेप लगैना कार्य भत्र्सनायोग्य ओ निन्दनीय रहल बा । नेपाल पत्रकार महासंघ, सुदूरपश्चिम प्रदेश समिति निज कानून सचिवहे कौनो पत्रकार पैसा खाके समाचार लिखल रलेसे, ओकर सप्रमाण महासंघके प्रदेश समितिहे उपलब्ध करैना चुनौती बा’ विरोधपत्रमे कहल बावै ।
प्रदेश सरकारके सचिव जैसिन व्यक्ति आपन पदीय मर्यादाके ख्यालै नैकैके अइसीन गैरजिम्मेवार ओ अफवाहपूर्ण अभिव्यक्ति डेना आपत्तिजनक रहल महासंघके ठहर रहल बावै ।
‘विश्व प्रेस स्वतन्त्रता दिवसके दिन पारके सचिव सुवेदीसे लिखल स्टाटसप्रति नेपाल पत्रकार महासंघ, सुदूरपश्चिम प्रदेश समिति पुनः घोर आपत्ति व्यक्त कैटी यथासिघ्र कानून बमोजिम कारबाहीके लाग प्रदेश सरकारसँग जोडदार माग करटी । हमार मागप्रति वेवास्ता करलमे नेपाल पत्रकार महासंघ कडा आन्दोलनमे उत्रना चेतावनी समेत डेना चाहटी’ अध्यक्ष शाहसे हस्ताक्षरित विरोध पत्रमे कहल बावै ।
बिरोध पत्र बुझ्टी कार्यबाहक मुख्यमन्त्री बहादुरसिह थापा प्रदेशस सरकारहे ध्यानाकर्षण हुइल ओ मुख्यमन्त्री भारत भ्रमणसे आइलपाछे उ बिषयमे प्रक्रिया आघे बह्रैना बटैलै ।
