काम हेरके मोर मुल्यांकन कैबीः एसपी राणा

पहुरा समाचारदाता
धनगढी, ३० बैशाख । जिल्ला प्रहरी कार्यालय कैलालीके प्रमुख प्रहरी उपरिक्षक बाल नरसिहं राणा आपन सेकटसम उत्कृष्ट काम कैना बटैले बटै ।

कैलाली जिल्लाके नेतृत्व सम्हारलपाछे मंगरके पत्रकारहुक्रसे करल परिचयात्मक तथा अन्तरक्रिया कार्यक्रममे प्रहरी उपरिक्षक राणा सरुमे बाचा कैनासे फेन कुछ काम कैके डेखैना बटाइल हुइट । ‘मै सुरुमे यी करम उ करम कहिके नैकहम’, उहाँ कहलै, ‘कुछ मजा काम कैबु ओ अपनेहुक्रे मोर काम हेरके मोर मुल्यांकन कैबी । मजा काममे अपनेहुक्रे सहयोग करबी कना फेन महिन विश्वास रहल बावै ।’

‘कैलाली जिल्ला प्रदेश राजधानी रहल जिल्ला हो’, उहाँ कहलै, “औरे बात एकसय किलोमिटरसे ढेर भारतसँगके सिमाना जोरल बा, यहाँ अधिकांश जिल्लाके मनैनके बसोबास रहल जिल्ला हो, सक्कु कारणसे कैलालीमे ढेर काम करे पर्ना मै डेख्ले बटुु, सिमा क्षेत्रमे हुइना तस्करी नियन्त्रणसे लागुऔषध नियन्त्रणसम प्रहरीके महत्वपुर्ण काम बावै, यकर साथे नागरिकके जिउ धनके रक्षा, अवैध क्रियाकलाप रोके पर्र्ना दायित्व बावै, यी दायित्व बोध हम्रे कैबी ।”

नागरिकहुक्रे मजा कामके अननुभुती कैना मेरके काम कैना राणा बटैलै । ओस्टके प्रहरी उपरीक्षक राणा जनताहे सही सेवा डेहक लाग प्रहरीके आचरण, व्यवहार सुधार कैना कार्यमे लागल बटैलै । प्रहरी ओ प्रहरीके व्यवहार ठिक नैहुइटसम जनता चाहल अनुसार सेवा डेहे नैसेक्ना कहटी उहाँ प्रहरीके आचरण ओ व्यवहार सुधारमे लागल बटैलै । ‘और जनहनहे सुधारक लाग ओ सेवा डेहक लाग सबसे पहिले हम्रे ठीक हुइ परल’, उहाँ कहलै, ‘हम्रे ठिक हुइलपाछे औरे जनहनहे ठिक करे सेकब ।’

उहाँ होटल रेस्टुरेन्टमे वेश्यावृत्ति करैना कुहीहे फेन नैछोर्ना, मने औरे जनहनहे अनावश्यक दुःख नैडेना बटैलै । राणा एकलौटी ढङ्गसे अपने काम नैकैना कहटी आघे कहलै, ‘पहिले मोर काम हेरबी, ओकरपाछे मूल्याङ्कन कैबी ।’

प्रहरी उपरीक्षक राणा प्रहरीके ढिलाइके कारण कुहीहे फेन समस्या नैहुइना मेरके सेकटसम हाली रेस्पोन्स कैना कार्यहे प्राथमिकता डेना बटैलै । जनतासे चाहल बमोजिम प्रहरी सेवा कहटी उहाँ कहलै, ‘पुलिस पुलिस जस्टे होके काम करे परठ् । प्रहरी कार्यालयमे बैठक लाग नैहोके, फिल्डमे खटक लाग हो ।’

कार्यक्रममे पत्रकारहुक्रे जिल्लामे शान्ति, सुरक्षाके अवस्था चुष्ट बनैना, सहज रूपमे सूचना उपलब्ध करैना, सीमा क्षेत्रमे हुइना अपराध नियन्त्रणमे विशेष ध्यान, प्रहरी आचरण व्यवहार सुधार कैना लगायतके सुझाव डेहल रहिट ।

नेपाल पत्रकार महासङ्घके अध्यक्ष श्रवण देउवा पत्रकारहे सहज रूपमे सूचना उपलब्ध कराइक् लाग प्रहरीहे आग्रह करल रहिट । उहाँ प्रहरीके साइबर सेलहे सशक्त ओ आउर बलगर बनाइ पर्र्ना आवश्यकता औंल्याइल रहिट । पत्रकारके सुरक्षाके ग्यारेन्टी कैना फेन अध्यक्ष देउवा प्रहरीहे आग्रह करल रहिट ।