कुष्ठरोग तथा क्षयरोग खोज पडतालके लाग अभिमुखीकरण

पहुरा समाचारदाता
हसुलिया, ३ असार । एकिकृत कुष्ठरोग सक्रिय खोजपडताल शिविर संचालनके लाग महिला स्वास्थ्य स्वम सेविका तथा स्वास्थ्यकर्मीहुकनहे अभिमुखीकरण कार्यक्रम सोम्मारके रोज मनाउँ आधारभूत स्वास्थ्य केन्द्रमे सम्पन्न हुइल बा ।

स्वास्थ्य कार्यालय धनगढी कैलालीके आयोजनामे हुइल कार्यक्रममे कैलारी गाउँपालिका स्वास्थ्य शाखा प्रमुख नरेश कुमार चौधरी वडा नम्बर १ कुष्ठरोगके जोखिम रहल बटैलै । उहाँ कहलै, यी वडामे १४ बर्ष तरेकमे कुष्ठरोग डेखपरलपाछे उच्च जोखिम डेखल हो ।

छाला सम्बन्धी रोग, कुष्ठरोग तथा क्षयरोगके नयाँ विमारी खोजपडतालके लाग यिहे ५ गते शिविर संचालन हुइना ओरसे कुछ समस्या डेखल बा कलेसे चेकजाँच करैना आग्रह करलै । रोग लागके उपचार कैनासे मजा रोग लागे नैदेना हो । समयमे चेकजाँच करलेसे रोगसे बाँचे सेक्ना बटैलै ।

कार्यक्रममे स्वास्थ्य कार्यालय कैलालीके प्रयोगशाला निरिक्षक दिपक जोशी छाला रोग तथा कुष्ठरोगबारे सहजीकरण करल रहिट । कुष्ठरोग लागल व्यक्ति एक्के चो औषधी खैले यी रोग नैसर्ना बटैलै । कार्यक्रममे सहजीकरण करटी कुष्ठरोग सम्बन्धी सामान्य जानकारी, गाउँपालिकामे कुष्ठरोगके स्थिति, कुष्ठरोग रोकथाम कार्यक्रम ओ यकर महत्वबारे जानकारी डेहल रहिट । बेलामे उपयुक्त उपचार नैहुइलेसे कुष्ठरोगके कारण अंगभंग वा विचलन हुइना ओरसे यी रोगहे चासोके रुपमे लेहे पर्ना बटैलै । यी रोगके कारण कौनोफे व्यक्ति शारिरीक, मानसिक एवं सामाजिक रुपमे हतोत्साहित हुइना करठै । यी रोग आँखीसे नैडेख्ना सुक्ष्म किटाणु माइक्रोव्याकटेरियम लेप्रेसे हुइना करठ । १०० जाने व्यक्तिमे किटाणु प्रवेश करलेसे ३ जनहनमे केल्ह यी रोग लग्ना सम्भावना रहठ । यकर लक्षण २ से ५ बर्ष पाछे ओ कुहीहे आउर पाछे देखैना करठ ।

कुष्ठरोगके लक्षण शरिरमे दाग, हातगोर झमझम कैना, शरिरके कौनो भागमे स्पर्श शक्ति हेराइल, हातगोरक अंगरी कम्जोर हुइना, बांग हुइना, आँखी झिमकाइ नैसेक्ना, बन्द करे नैसेक्ना, कानके लोटी मोट हुइना, अनुहारके छाला लाल हुइना, चम्किलो, शरिरमे गिर्खा, नैबठैना घाउ, मांसपेशी कम्जोर हुइना लक्षण डेखा पर्ना प्रयोगशाला निरिक्षक जोशी बटैलै ।

ओस्टेक करके आइएफके मानबहादुर महराफे छाला रोग, कुष्ठरोग ओ क्षयरोग सम्बन्धी जानकरी डेहल रहिट । कार्यक्रममे मनाउँ आधारभूत स्वास्थ्य केन्द्रके प्रमुख कुुसुम चौधरी, स्वास्थ्य कार्यालय कैललालीके क्षयरोग कार्यक्रम संयोजक अमिर रिजाल, मनाउँ आधारभूत स्वास्थ्य केन्द्रके महेन्द्र कठरिया, भल्मन्सा, गुरुवा, महिला स्वास्थ्य स्वम सेविका ओ स्वास्थ्यकर्मीहुकनहे सहभागिता रहे ।