उत्कृष्ट नतिजा लनुइया विद्यार्थीहे सम्मान
पहुरा समाचारदाता
घोडाघोडी, १८ असार । कैलालीके घोडाघोडी नगरपालिका कक्षा ८ ओ एसइइ परीक्षामे उत्कृष्ट नतिजा लनुइया विद्यार्थी ओ विद्यालयहे सम्मान करले बा । नगरपालिकासे बुधके एक कार्यक्रमके आयोजना कैके उत्कृष्ट नतिजा लनुइया विद्यार्थी ओ विद्यालयहे सम्मान करल हो । नगर प्रमुख खडक बहादुर रावत विद्यार्थी ओ विद्यालयहे सम्मान पत्र सहित सम्मान करल रहिट ।
सम्मानित हुउइया विद्यार्थीनमे कक्षा ८ मे उत्कृष्ट नतिजा लन्ना सफल पाईनस स्कलरशीप एकेडेमी पहलमानपुरके यस भट्ट ४ जीपिए ओ झरना रावल ३.८४ जीपिए, कान्ति राज्य लक्ष्मी मावि पहलमानपुरके मुना चौधरी ३.९४ जीपिए, राष्ट्रिय मावि सुखडके उत्सव उवाई रहल बटै ।
ओस्टके एसइइ ओर पाइनस स्कलरशीप एकेडेमीके रक्षा बुढा ४ जीपिए, नविन अवस्थी ओ सागर आचार्य ३.९१ जीपिए लानल रहिट । ओस्टके दरख मावि हरिनगरके जिया चौधरी, छाडी मावि बेलारके प्रकाश देवकोटा ३.७४ जीपीए लानके सम्मानित हुइल बटै ।
ओस्टके उत्कृष्ट नतिजा लन्ना सफल विद्यालयमे कक्षा ८ ओर पिस लाइट इंग्लिश बोर्डिंङ्ग स्कुल सुखड सत प्रतिशत नतिजा लानके सम्मानित हुइल बा । छाडी मावि बेलार ९५.८ प्रतिशत लन्ले बा कलेसे एसइइ ओर पाइनस स्कलरशीप एकेडेमी पहलमानपुर ओ जनज्योति मावि सुन्दरपुर उत्कृष्ट नतिजा लानके सम्मानित हुइल जनाइल बा ।
कार्यक्रममे नगर प्रमुख रावत पालिकाके सबसे ढेर बजेट शिक्षामे लगानी हुइल बटै्रलै । उहाँ नगर भिट्टरके विद्यार्थी ओ शिक्षकके मेहनतसे पालिकाके शिर उच्च हुइल बटैलै । उहाँ ढेर विद्यालय निराशा जनक नतिजा लानल कहटी उहीहे सुधार करे पर्ना फेन बटैलै । ओस्टके शैक्षिक संस्थाहे बालमैत्री ढंगसे संचालन करे सेक्लेसे शैक्षिक सुधारमे मद्दत पुग्ना बटैलै ।
बालबालिकाहुक्रनमे लागु औषध दुव्यर्सनीके लत बह्रटी गैल बेला इहीहे शिक्षक तथा आभिभावक नियन्त्रणके लाग भूमिका खेले पर्ना बटैलै ।
कौनो फेन विद्यार्थी शिक्षामे सफलता पाइक लाग अभिभावकके सोचाई चिन्तन बदले पर्ना मेयर रावतके भनाइ रहल रहे ।
शिक्षा शाखा प्रमुख खकेन्द्र बहादुर सिंह पालिका भिट्टरके विद्यार्थी उत्कृष्ट नतिजा लानलमे खुशी व्यतm करल रहिट । उहाँ घोडाघोडी नगरपालिकाके शिक्षामे क्रमिक रुपमे सुधार हुइल फेन बटैलै । उहाँ पालिका भिट्टरके कुछ विद्यालय निराशा जनक नतिजा लानल फेन बटैलै ।
शैक्षिक गुणस्तर डेहे नैसेकल विद्यालयहे आगामी दिनमे शैक्षिक गुणस्तर दिगो बनाइक लाग छलफल कैके गहन होके लागे पर्ना शिक्षा शाखा प्रमुख सिंह बटाइल रहिट ।
