प्रेस स्वतन्त्रता दिवस मनागिल
पहुरा समाचारदाता
धनगढी, २० वैशाख । विश्व प्रेस स्वतन्त्रता दिवसके अवसरमे “शान्तिपूर्ण भविष्यके निर्माणः मानव अधिकार विकास ओ सुरक्षाके लाग प्रेस स्वतन्त्रताके प्रवर्द्धन” कना मूल नारासहित धनगढीमे ऐक्यबद्धता र्याली सम्पन्न कैगिल बन ।
नेपाल पत्रकार महासंघ कैलाली जिल्लाके आयोजनामे हुइल उ कार्यक्रममे नेपाल पत्रकार महासंघके पुर्व सुदूरपश्चिम प्रदेश संयोजक मनमोहन स्वाँर पत्रकारके हकहित ओ पेशागत सुरक्षाके लाग अब पहिलेसे थप सशक्त रूपमे आघे बह्रेपर्ना आवश्यकता औंल्यइलै । उहाँ बडल्टी परिस्थितिमे प्रेसउप्पर डेखल चुनौतीके सामना कैना पत्रकार एकजुट हुईपर्ना बटैलै ।
इन्सेकके प्रदेश संयोजक खड्कराज जोशी लोकतन्त्रमे प्रेस स्वतन्त्रताके महत्वपूर्ण भूमिका रना उल्लेख करटी कौनोफे बहानामे यिहीहे नियन्त्रण कैना प्रयास स्वीकार्य नैहुइना धारणा रख्लै ।
ओस्टेक राष्ट्रिय मानव अधिकार आयोग सुदूरपश्चिम प्रदेशके अधिकृत विदेशराम चौधरी अभिव्यक्ति स्वतन्त्रता कुण्ठित कैना कौनोफे गतिविधि सह्य नैहुइना बटैलै । नेपाल पत्रकार महासंघके केन्द्रीय सदस्य योगेन्द्र बलायर पछिल्का समय प्रेस स्वतन्त्रता हननके घटना बह्रटी रहलप्रति ध्यानाकर्षण करैटी सक्कु सञ्चारकर्मीहे आचारसंहितामे आधारित रना समाचार संकलन कैना आग्रह करलै ।
कार्यक्रममे पत्रकार महासंघ कैलालीके अध्यक्ष श्रवण देउवा पत्रकार महासंघ सदा पत्रकारके हकहितके पक्षमे रहल कहटी वर्तमान सरकारसेफे प्रेसउप्पर चुनौती ठपल बटैलै । र्याली पाछेक कोणसभा नेपाल पत्रकार महासंघ कैलालीके सचिव तेजराज भट्ट सञ्चालन करल रहिट ।
