हसुलिया बजारसे घुरहा पुलसमके हुलाकी डगर क्षेत्रमे वृक्षारोपण

पहुरा समाचारदाता
धनगढी, २६ असार । कैलाली जिल्ला कैलारी गाउँपालिका अन्र्तगत हसुलिया बजारसे घुरहा पुगसमके हुलाकी डगरके दुनु किनारमे वृक्षारोपण कैगिल बा ।

कैलारी गाउँपालिकाके सहयोगमे बसन्ता सिएफसिसि कैलारी–३ सुर्मिनालासे टमान जाँतके ३२ सय रुखुवाके टेलुवा लगागिल हो । बसन्ता सामुदायिक वन समन्वय समितिके अध्यक्ष रमेश चौधरीके अनुसारके अनुसार हसुलिया बजारसे लेके घुरहा पुलसम हुलाकी सडका आसपास टमान जातके रुखुवा लगागिल हो ।

उहाँक अनुसार अशोक, बकाइनो, असारे फुला, सटलचिङगनी, गुल्हमोहर, विरेन्द्र फुला, बरामसीलगायत टमान जातके टेलुवा लगागिल बा । वृक्षारोपण कार्यक्रमके उदघाटन कार्यक्रममे कैलारी गाउँपालिकाके वन तथा वातावरण समितिके संयोजक ठागुराम चौधरी, सामाजिक विकास समितिके समिति संयोजक सन्तराम चौधरी, वडा सदस्यहुक्रे, बसन्ता सिएफसीसीके प्रतिनिधिहुक्रे ओ स्थानीयाहुकनके सहभागितामे उ वृक्षारोपण कैगिल बा ।

हसुलिया बजारसे घुरहा पुगसमके हुलाकी डगरके दुनु किनारसम लगासेकलपाछे कैलारी गाउँपालिका वडा नम्बर ३ स्थित पुरैना (कमलपोखरी) ताल क्षेत्रमेफे वृक्षारोपण कैगिल बसन्ता सिएफसीसीके सदस्य सीता चौधरी जानकारी डेली । वृक्षारोपण कैगिल मने उहीहे बचाइक लाग त्रिगार्ड आवश्यक रना उहाँ जनैली ।