धनगढीसे सावनसे भूमि प्रशासन सेवा प्रवाह कैना
पहुरा समाचारदाता
धनगढी, २७ असार । धनगढी उपमहानगरपालिकासे सुदूरपश्चिम प्रदेशमे पहिलचो भूमि प्रशासन सेवा प्रवाह सुरु कैना हुइल बा ।
आर्थिक बरस २०८३÷८४ के सावन १ गतेसे उपमहानगर भिट्टरके भूमि प्रशासन (मालपोत ओ नापी) के सक्कु काम कैना उपमहानगर जनैले बा ।
भूमि प्रशासन सेवा प्रवाहके लाग शुकसे उपमहानगरके २० कर्मचारीनहे तालिम डेना सुरु करल बा । भूमि व्यवस्था सहकारी संघीय मामिला तथा सामान्य प्रशासन मन्त्रालय मातहत रहल भूमि व्यवस्थापन प्रशिक्षण केन्द्रसे उपमहानगरके २० कर्मचारीनहे ५ दिनके तालिम डेना सुरु करल उपमहानगर जनैले बा ।
नगरप्रमुख गोपाल हमाल भूमि प्रशासन सेवा प्रवाह सम्बन्धी तालिमके उद्घाटन करल रहिट । धनगढी उपमहानगरपालिका संविधानसे टोकल स्थानीय तहके अधिकार मध्ये भूमि प्रसासन सेवाके सुरुवात कैना सुदूरपश्चिम प्रदेशके पहिल नगरपालिका रहल फेन उहाँ बटैलै ।
‘नगरबासीहे भूमि प्रशासन सेवा डेना पहिल नगरपालिका बनल बटी । इहीसे नगरबासीके जग्गा ब्यवस्थापन, खरिद विक्रि, कित्ताकाट ओ रजिष्ट्रेसनमे सहज हुइना बा’ मेयर हमाल कहलै । ‘इ चुनौतीपूर्ण रहे मने नगरबासीनके सहजताके लाग संविधानसे डेहल अधिकार क्षेत्रके सेवा प्रवाहके लाग तयार हुइल बटी ।’
उद्घाटन कार्यक्रममे उपमेयर कन्दकला राना, कैलालीके प्रमुख जिल्ला अधिकारी, हेमन्त राज रेग्मी, प्रमुख भूमि अधिकृत लक्ष्मण कडायत सहित नापी कार्यालय सहितके अधिकारीहुक्रनके सहभागिता रहल रहे ।
धनगढी उपमहानगरपालिका भिट्टर १९ ठो वडा रहल बावै । १९ वडाके भूमि प्रशासनके काम उपमहानगरसे करलमे मालपोत ओ नापीहे रहल कामके बोझ कुछ कम हुइना बा ।
