धनगढीमे अपाङ्गता पहिचान तथा परिचयपत्र वितरण प्रणाली सम्बन्धी परीक्षण कार्यक्रम

पहुरा समाचारदाता
धनगढी, २४ सावन । अपाङ्गता हुइल व्यक्तिके पहिचान, परिचयपत्र वितरण तथा तथ्यांक व्यवस्थापनहे थप सहज ओ प्रभावकारी बनैना उद्देश्यसे धनगढीमे अपाङ्गता पहिचान तथा परिचयपत्र वितरण प्रणाली एप ओ सामाजिक सूचना व्यवस्थापन प्रणालीके पाइलटिङ तथा परीक्षण कार्यक्रम सम्पन्न हुइल बा ।

सामाजिक सुरक्षा नागरिक समाज सञ्जाल ओ निड्स नेपालके आयोजनामे हुइल कार्यक्रममे युरोपियन युनियन ओ संयुक्त राष्ट्रसंघके आर्थिक सहयोग तथा महिला, बालबालिका, लैङ्गिक तथा यौनिक अल्पसंख्यक तथा सामाजिक सुरक्षा मन्त्रालयके समन्वय रहल रहे ।
कार्यक्रममे सुदूरपश्चिम प्रदेशके १० ठो पालिकाके उपप्रमुख, प्रमुख प्रशासकीय अधिकृत, कर्मचारी तथा टमान संघसंस्थाके प्रतिनिधिके सहभागिता रहे ।

कार्यक्रममे धनगढी उपमहानगरपालिकाके उपप्रमुख कन्दकला कुमारी राना अपाङ्गता हुइल व्यक्तिके क्षेत्रमे धनगढी उपमहानगरपालिकासे सुरुसे काम करटी आइल बटैली । उहाँ सुदूरपश्चिमके अन्य पालिकाहे आवश्यक सहयोग ओ सहकार्य कैना धनगढी उपमहानगरपालिका सदां तयार रहल बटैली ।

सुदूरपश्चिम अपाङ्ग महासंघके अध्यक्ष नन्दराज भट्ट अपाङ्गतासम्बन्धी अवधारणा, यकर विकासक्रम, चिकित्सकीय तथा सामाजिक मोडल ओ अपाङ्गता सामाजिक निर्माणके विषयमे प्रस्तुति डेहल रहिट । उहाँ अपाङ्गता हुइल व्यक्तिहे सम्बोधन करेबेर मर्यादित भाषा प्रयोग करेपर्नामे जोड डेलै ।

भट्ट नेपालमे ६ लाख ५४ हजार ७ सय ८५ जाने अपाङ्गता हुइल व्यक्ति रहल जानकारी डेटी शारीरिक, दृष्टिविहीन, श्रवण, स्वर तथा बोली, मानसिक, बौद्धिक, हेमोफिलिया, अटिजम ओ बहुअपाङ्गतासहित टमान मेरिक अपाङ्गताबारे जानकारी करैलै ।

उहाँ अपाङ्गता हुइल व्यक्तिके लाग हुइल कानुनी व्यवस्था, सञ्चार तथा सामाजिक अवरोध ओ स्थानीय अपाङ्गता समन्वय समितिमे डेख्ना प्रमुख जटिलताबारेफे जानकारी डेलै ।

कार्यक्रमके सहजकर्ता उमङ्ग मैनालीसे एप तथा सामाजिक सूचना व्यवस्थापन प्रणालीके प्रयोग, अपाङ्गता पहिचान तथा परिचयपत्र वितरण प्रणालीके विकासक्रम, स्वमूल्याङ्कन प्रावधान ओ डाटाबेस व्यवस्थापनबारे प्रस्तुति डेहल रहिट ।

डिजिटल प्रणालीके प्रयोगसे स्थानीय तहसे अपाङ्गता हुइल व्यक्तिके तथ्यांक व्यवस्थित कैना, परिचयपत्र वितरणहे सहज बनैना तथा सेवाग्राहीसे वडा तहसे सेवा लेहे सेक्ना वातावरण निर्माण करे सेक्ना कार्यक्रममे जानकारी डेहल रहे । चिकित्सकसे प्राप्त आवश्यक कागजातके आधारमे अपाङ्गता पहिचान तथा परिचयपत्र वितरणके प्रक्रिया आघे बह्राइ सेक्ना विषयमे समेत छलफल हुइल रहे ।

कार्यक्रममे अपाङ्गता हुइलल व्यक्तिहे सहज रूपमे सेवा उपलब्ध करैना, स्मार्ट कार्डके व्यवस्था कैना तथा स्थानीय तहमे अपाङ्गता हुइल व्यक्तिके तथ्यांक व्यवस्थित कैना विषयमे छलफल करल रहे ।

कार्यक्रममे बोल्टी सामाजिक सुरक्षा क्षेत्रके त्रिलोत्तम पौडेल अपाङ्गताके क्षेत्रमे विगतसे हुइटी आइल प्रयास क्रमशः प्रभावकारी बन्टी गैल बटैैलै । उहाँ अपाङ्गतासम्बन्धी विषयमे कौनोफे समस्या डेख्लेसे आवश्यक सहयोग कैना प्रतिबद्धता व्यक्त करटी यैसिन कार्यक्रम हरेक पालिकामे विस्तार करेपर्नामे जोड डेलै ।

उहाँ नीति तथा योजना निर्माण करेबेर बालबालिका, अपाङ्गता हुइल व्यक्ति तथा सक्कु वर्गके नागरिकहे सहज हुइना करके योजना बनाईपर्ना बटैलै । कौनोफे नीति तथा कार्यक्रम कार्यान्वयन करेबेर उहीसे बालबालिका वा अपाङ्गता हुइल व्यक्ति प्रभावित हुइना अवस्था बा की नैहो कना विषयमे ध्यान डेहेपर्ना उहाँक कहाई रहे ।

कार्यक्रमके सहजीकरण निड्स नेपालके मीन शाहीसे करल रहिट । कार्यक्रममे सहभागी पालिकाके प्रतिनिधि प्रणालीहे प्रभावकारी रूपमे कार्यान्वयन कैन स्थानीय तहमे आवश्यक तालिम, जनशक्ति ओ प्राविधिक सहयोग उपलब्ध कराईपर्नामे जोड डेहल रहिट ।