माघ ५ से लग्ना प्रदेशस्तरीय सीप तथा रोजगार मेलाके लाग धनगढी उपमहानगरपालिकाके तयारी तीव्र
पहुरा समाचारदाता
धनगढी, २३ सावन । धनगढी उपमहानगरपालिकासे वार्षिक क्यालेन्डरअनुसार अइना प्रदेशस्तरीय सीप तथा रोजगार मेला सञ्चालनके लाग तयारी तीव्र परले बा । यी वर्ष क्यालेन्डर अनुसार माघ ५ गतेसे मेला सुरु कैना लक्ष्यसहित आवश्यक पूर्वतयारी आघे बह्राइल उपमहानगरपालिका जनैले बा ।
उपमहानगरपालिकाके अनुसार २०८१ ओ २०८२ सालमे समेत प्रदेशस्तरीय सीप तथा रोजगार मेला सफलतापूर्वक सञ्चालन करल रहे । २०८१ सालके मेलामे १ हजार ४० जाने शिक्षार्थीके सहभागिता रहे । कलेसे २०८२ सालके मेलामे ६ सयसे ढेर युवायुवती सहभागी हुइल रहिट । विगतके मेलासे प्राप्त अनुभवहे आधार बनाके यी बारके मेलाहे आउर व्यवस्थित, प्रभावकारी ओ युवामैत्री बनैना योजना बनाइल बा ।
तयारीके क्रममे टमान संघसंस्था, रोजगारदाता, तालिम प्रदायक संस्था तथा सरोकारवाला निकायसंग छलफल, समन्वय ओ सहकार्यहे तीव्र बनाइल बा ।
यी आघे २०८२ सालमे आयोजित मेलामे सुदूरपश्चिम प्रदेशके ८४ स्थानीय तहके सहभागिता रहे ।
७ प्रमुख क्षेत्रअन्तर्गत २२ विधाके सीपमूलक तालिम सञ्चालन करल उ कार्यक्रममे सहभागीहे ३० दिनके सीप विकास तालिमसँगे १० दिन रोजगारीसँग जोरना व्यावहारिक अभ्यास ओ उद्यमशीलता तालिम समेत प्रदान करल रहे ।
सीप तथा रोजगार मेलाहे तालिम डेना–लेना कार्यक्रममे केल्ह सीमित नैधारके स्थानीय उत्पादनके प्रवद्र्धन ओ बजारीकरणहे समेत प्राथमिकतामे धारल रहे । उपमहानगरपालिकासे निःशुल्क स्टलके व्यवस्था करके टमान स्थानीय तह तथा संघसंस्थाहे अपन उत्पादन तथा गतिविधि प्रदर्शन कैना अवसर प्रदान करल रहे ।
डोटीके जोरायल गाउँपालिकालगायत टमान स्थानीय तहके सहभागितासे मेलाहे सीप, रोजगारी, उद्यमशीलता ओ अनुभव आदानप्रदान कैना साझा मञ्चके रूपमे स्थापित करल उपमहानगरपालिकाके कहाई बा ।
आगामी मेलामार्फत श्रम बजारके मागअनुसारके सीप प्रदान करटी युवायुवतीहे रोजगारी तथा स्वरोजगारसंग जोरना लक्ष्य राखल बा । साथे, स्थानीय उत्पादन ओ उद्यमशीलताके प्रवद्र्धन करटी सीपयुक्त जनशक्तिहे अवसरसँग जोरना करके मेलाहे आउर प्रभावकारी बनैना तयारी करल बा ।
वार्षिक क्यालेन्डरअनुसार निर्धारित समयमे मेला सञ्चालन हुइना करके सक्कु तयारी आघे बढाइल उपमहानगरपालिका जानकारी डेले बा ।
