कैलारी–५ पवेरामे सावन डोलाके उदघाटन

पहुरा समाचारदाता
धनगढी, २४ सावन । कैलाली जिल्लाके कैलारी गाउँपालिका वडा नम्बर ५ पवेरा गाउँमे सावन डोलाके उदघाटन कैगिल बा ।

गाउँक भल्मन्सा रामबहादुर कठरियाके अध्यक्षतामे हुइल कार्यक्रममे प्रदेश सभा सदस्य घनश्याम चौधरी प्रमुख अतिथि रहल रहिट । कार्यक्रममे सम्बोधन करटी उहाँ कठरिया समुदायके सावन डोला पहिचान ओ रिति संस्कृति रहल बटैलै । कार्यक्रममे विशिष्ट पहुना पूर्व जिल्ला विकास समितिके सदस्य परसराम चौधरी कठरिया समुदायके पहिले पुर्खासे सावन डोला झुल्टी आइलमे विचहे हेरााइल मने दुई बरस यहोरसे पवेरामे निरन्तर झुल्टी आइल बटैलै ।

कैलारी गाउँपालिका योजना शाखा प्रमुख सन्तोषकुमार चौधरी ओ वडा सदस्य मानबहादुर चौधरी सावनहे पुस्तान्तरण करेक लाग निरन्तरता डेना जरुरी रहल बटैलै ।

कार्यक्रममे वडा सदस्य भागुदास चौधरी, अनारकली चौधरी, गुर्गी सिचाई आयोजनाके अध्यक्ष भीष्मराज चौधरीलगायत गाउँक बुद्धिजिवीहुकनके सहभागिता रहे । कार्यक्रममे स्वागत मन्तव्य अमरकेटी चौधरी करल रही ।