कैलारी–४ ‘के गाउँ’मे फुटवल प्रतियोगिता सुरु

पहुरा समाचारदाता
हसुलिया, २० भदौ । कैलाली जिल्लाके कैलारी गाउँपालिका वडा नम्बर ४ स्थित के गाउँके खेल मैदानमे शनिच्चरके रोजसे पुरुष ओ महिला फुटवल प्रतियोगिता सुरु हुइल बा ।

थारु समुदायमे अँटवारी टिहुवार ओ नेपाली महिलाहुकनके महान पर्व हरितालिका तिजके अवसरमे न्यू युवा सुन्दर शक्ति क्लवके आयोजनामे फुटवल प्रतियोगिता सुरु हुइल हो ।

फुटवल प्रतियोगिताके उदघाटन कार्यक्रमके प्रमुख अतिथि कैलारी गाउँपालिका अध्यक्ष राजसमझ चौधरी करल रहिट । कार्यक्रममे सम्बोधन करटी उहाँ घरेलु टिमहे अवसर प्रदान करेक लाग प्रतियोगिता आयोजना हुइना मजा बाट रहल कहटी गाउँपालिकासे शिक्षा, स्वास्थ्य, कृषिसंगे खेलकुदओर बजेट विनियोजन करटी आइल बटैलै ।
उहाँ कहलै, ‘कैलारी गाउँपालिकाके खेलाडी अब्वल खेलाडीके रुपमे स्थापित हुइटी गैल मने यहाँ खेलमैदानके अभाव रहल बा । खेलकुद प्रतियोगिता तथा खेलकुद सामाग्रीके लाग पालिका प्रत्येक बरस बजेट विनियोजन करटी आइल बा । न्यू युवा सुन्दर शक्ति क्लवके खेलमैदानमे भौतिक संरचना बनाइक लाग डिपिआर तयार करल जनैलै ।
कार्यक्रमके दुसर विशिष्ट पहुना निसर्ग हस्पितल एण्ड रिसर्च सेन्टरके अध्यक्ष तिर्थराज पन्त यूवाहुक्रे लागु औषधके दुव्र्यशनीमे फस्टी गैल बटै खेलकुद प्रतियोगिता हुइलेसे यूवाहुकन यिहे क्षेत्रमे व्यस्त बनैलेसे गलत डगर जैनासे बञ्चित रना बटैलै ।
उहाँ कहलै, ‘खेलकुदसे अनुशासित बनाइठ । देशके विकासमे टेवा पुगाठ । अब्बे यूवा लागु औषधके कुलटमे फस्टी गैल बटै । यूवाहे खेलकुदमे व्यस्ता बनाइ सेक्लेसे देशके विकास, शारिरीक विकासफे हुइठ । उहीहे लागु औषध दुव्र्यशनीफे नियन्त्रण करे सेक्जाई ।’
विशिष्ट पहुना निसर्ग हस्पितल एण्ड रिसर्च सेन्टरके बाल रोग विशेषज्ञ प्रदीप मिश्र खेलकुडसे स्वास्थ्य बनैना करल ओरसे यिहीहे निरन्तरता डेहे पर्ना बटैलै । गाउँठाउँमे आयोजना हुइना यी मेरिक प्रतियोगितासे गाउँघरमे नुकल प्रतिभाके उजागर हुइना बटैलै । उहाँ कहलै, ‘प्रतियोगितासे गाउँघर हुइटी जिल्ला, प्रदेश, राष्ट्रिय अन्तर्राष्ट्रियस्तरमे अवसर पाके अपन प्रतिभा डेखाई सेक्ठै ।

कैलारी गाउँपालिका वडा नम्बर ४ के वडा अध्यक्ष ठागुराम चौधरी खेलकुदके माध्यमसे यी वडाहे चिन्हाइल बटैलै । खेलकुद मैदानमे चाहल भौतिक पूर्वाधार निर्माणके लाग प्रदेश सरकारके लगानी हुइपर्ना बटैलै ।
न्यू युवा सुन्दर शक्ति क्लवके खेलमैदानमे भौतिक संरचनाके कमी बा । छोट छोट संरचना स्थानीय सरकारसे पुरा करेसेकी मने भारी संरचना बनााइक लाग प्रदेश सरकार सहयोग कैना जरुरी बा उहाँ कहलै ।
कार्यक्रममे सुदूरपश्चिम नेपाली समाज इजरायालके अध्यक्ष तथा थारु कल्याणकारिणी सभा इजरायालके संरक्षक कृष्ण चौधरी मन्तव्य कैटी प्रतियोगिताके सफलताके शुभकामना व्यक्त करल रहिट । उहाँ अपनेहुक्रे सहयोग करे पाके खुशी लागल बटैलै ।
आयोजक क्लवके अध्यक्ष बृक्षलाल चौधरीके अध्यक्षतामे हुइल कार्यक्रममे स्वागत मन्तव्य न्यू युवा सुन्दर शक्ति क्लवके खेलकु्द संयोजक देवनारायण चौधरी करल रहिट । संचालन सुनिता चौधरी करल रही ।
कार्यक्रममे कैलारी गाउँपालिकाके वडाअध्यक्षहुक्रे, कार्यपालिका सदस्य लालबहादुर विक, वडा सदस्य लक्ष्मी चौधरी, शोभा परियार, निसर्ग अस्पतालके म्यानेजर केशव जोशी, हिम सिखर सहकारीके अध्यक्ष रोशन सिंह समाजसेवी, बुद्धिजीवी, टमान राजनितिक दलके प्रतिनिधिलगायत टमान खेलकुद समितिके प्रतिनिधि, वडा नम्बर ४ अन्र्तगतके भल्मन्साहुकनके सहभागिता रहे ।
भदौ २० गतेसे ३१ गतेसम सञ्चालन हुइना प्रतियोगितामे १६ ठो पुरुष टीम ओ ८ ठो महिला टीमके सहभागिता रना जनैलै ।
प्रतियोगिताके विजेताहे पुरुषओर नगद एक लाख प्रदान कैना बा कलेसे उपविजेताहे ५० हजार प्रदान कैना आयोजक क्लव जनैले बा । ओस्टेक करके महिलाओरके विजेताहे ४० हजार ओ उपविजेता टीमहे २५ हजार प्रदान कैना क्लवके अध्यक्ष बृक्षलाल बटैलै । प्रतियोगिताके मुख्य प्रवद्र्धकमे कैलारी गाउँपालिका सहायक प्रवद्र्धनमे वडा नम्बर ४ के कार्यालय ओ खास प्रयोजक निसर्ग अस्पताल प्रालि रहल बा ।