बालबालिका तथा किशोरकिशोरीके मानसिक स्वास्थ्य सम्बन्धी पाँच दिने कार्यशाला सुरु
पहुरा समाचारदाता
धनगढी १४ कुवाँर । बालबालिका तथा किशोरकिशोरीके मानसिक स्वास्थ्य सम्बन्धी पाँच दिने कार्यशाला धनगढीमे सुरु हुइल बा ।
सिविन नेपालके आयोजनामे कैलालीके चार पालिकाके स्वास्थ्य कर्मचारीहुकनके लाग तालिम सुरु हुइल हो । सिविन नेपाल कैलालीके जिल्ला सयोजक हरिलाल चौधरीके अध्यक्षतामे हुइल कार्यक्रममे स्वास्थ्य कार्यालय कैलालीके प्रमुख रमेश कुवँर प्रमुख अतिथी रहल रहिट । तालिम उदघाटन कार्यक्रममे सम्बोधन करटी उहाँ स्वास्थ्य क्षेत्रमे मानसिक समस्यफे जटिल रुपमे डेखा परटी आइल बटैलै ।
मानसिक स्वास्थ्य समस्य बह्रटी बा, उहाँ कहलै, यकर उपचार समुदाय स्तरमे हुइना जरुरी बा । स्वास्थ्यकर्मीहुकनहे तालिम डेलेसे गाउँघरमे उपचार ओ मनोपरामर्श डेहे सेक्जाई ।
सिविन नेपाल कैलालीके जिल्ला सयोजक हरिलाल चौधरी बालबालिका तथा किशोरकिशोरीमे डेखल मानसिक स्वास्थ्य समस्याहे न्यूनिकरण करेक लाग स्वास्थ्यकर्मीहुकनके लाग यी तालिम संचालन करल बटैलै ।
तालिममे कैलाली जिल्लाके धनगढी उपमहानगरपालिका, कैलारी गाउँपालिका, भजनी नगरपालिका ओ जोशीपुर गाउँपालिकामे कार्यरत रहल स्वास्थ्य कर्मचारीहुकनके सहभागिता रहल बा । कार्यक्रमके सञ्चालन पशुपति कुवँर करल रहिट ।
पाँच दिने तालिममे सिविन नेपालके मनोचिकित्सक डा. अमित झा ओ सुइकृति कर्मचार्य प्रशिक्षण डेटि रहल बटै । तालिममे स्वागत तथा उद्देश्यबारे जानकारी डेटी मनोचिकित्सक डा. अमित झा सबसे पहिले मानसिक स्वास्थ्यके पहिचान कैना, व्यवस्थापन कैना, कैसिक मेरिक औषधी उपचारके आवश्यकता बा । उ समस्यामे परल बालबालिका तथा किशोरकिशोरी रेफर कैसिक कैना विषय बस्तुमे तालिम डेटी रहल बटैलै ।
