बघ्वक आक्रमणसे एक पुरुषके मृत्यु
पहुरा समाचारदाता
धनगढी, १६ कुँवार । कैलालीके गौरीगंगा नगरपालिका–६, मोयास्थित भैरव महिला सामुदायिक बन्वामे बघ्वक आक्रमणसे एक पुरुषके मृत्यु हुइल बा ।
बिफेक रोज सकारे बेम्टी खोजे बन्वा गैल गौरीगंगा नगरपालिका–६ चरीडाँडा निवासी करिब ३८/४० वर्षीय कृष्ण चौधरीहे बघ्वा आक्रमण करल प्रहरी जनैले बा । प्रहरीके अनुसार सकारे करिब ५ बजे बेम्टी खोज्ना क्रममे चौधरीहे बघ्वा आक्रमण करल रहे । घटनाबारे सकारे ८ः०५ बजे इलाका प्रहरी कार्यालय चौमालामे जानकारी प्राप्त हुइल रहे ।
जानकारी प्राप्त हुइलपाछे प्रहरी वरिष्ठ नायव निरीक्षक रमेशबहादुर शाहीके कमान्डमे चार जनहनके प्रहरी टोली घटनास्थलमे खटल रहे । प्रहरी टोली सकारे ८ः४५ बजे घटनास्थल पुगल जनाइल बा ।
प्रहरीके अनुसार घटनास्थल इलाका प्रहरी कार्यालय चौमालासे करिब १३ किलोमिटर पश्छिउ–डख्खिन ओेर परठ् । घटनाबारे थप विवरण तथा बघ्वक अवस्था सम्बन्धमे प्रहरी आवश्यक अनुसन्धान तथा खोजी करटी रहल जनाइल बा ।
