धनगढी एफसी ओ काठमाडौं स्पोर्टस डेभलपमेन्ट भेन्चर्स प्रालीके हातेमालो

पहुरा समाचारदाता
काठमाडौं, १३ कार्तिक । ६ वर्ष आघे धनगढी फुटबल क्लब (धनगढी एफसी) के स्थापना हुइल यहोर टोलीसे फ्रेन्चाइज मोडलमे आयोजना हुइटी रहल नेपाल सुपर लिग फुटबल प्रतियोगिता खेल्टी आइल रहे ओ अन्य समाजिक कार्यके गतिविधमे आवद्ध संलग्नता रहटी आइल बा । गो ड्रिमर्स कम्पनीके धनगढी एफसीसे नेपाल सुपर लिग फुटबलके पहिल दुई संस्करणमे फाइनल खेलल रहे । ओस्टे टिसरा संस्करणमे प्लेअफ खेलल रहे ।

धनगढी एफसीसे सुदूरपश्चिमके भावनाहे प्रतिनिधित्व करटी नेपाली फुटबलमे अपन कौशलता डेखैटी रहल बा । यिहे क्रममे नेपाली फुटबलहे सुदूरपश्चिममे मजबुत सम्बन्धहे जोरना महत्वपूर्ण कदम खेल्टी आइल बा । सुवास शाही अध्यक्ष ओ सञ्चालक रहल धनगढी एफसीसे उ क्रममे ढेर साझेदारसंग सहकार्य करटी आइल रहे ।

यिहे क्रममे धनगढी एफसीसे अपन दायराहे बल्गर बनैना क्रममे काठमाडौं स्पोर्टस डेभलपमेन्ट भेन्चर्स प्रालीसंग हातेमालो करले बा । काठमाडौं स्पोर्टस डेभलपमेन्ट भेन्चर्सके टोली काठमान्डु गोर्खाजसे नेपाल प्रिमियर लिग (एनपिएल) क्रिकेट खेल्टी आइल बा । यी सहकार्यपाछे फुटबल, क्रिकेटसहित अन्य गतिविधिहे एक्के साथ आघे बह्रैना उद्धेश्यसे सुदूरपश्चिम स्पोर्टस भेन्चर्स कम्पनी स्थापना करल बा ओ जेम्ने सुवास शाही ओ काठमाडौं स्पोर्टस डेभलपमेन्ट भेन्चर्सके समान लागत हुइना बा ।

उ सम्झौता अनुरुप डा. उपेन्द्र महतो सुदूरपश्चिम स्पोर्टस भेन्चर्सके अध्यक्ष रहिट कलेसे सुवास शाही सञ्चालक ओ अनुभव स्वार सिरोहिया कार्यकारी निर्देशकमे रहल बा । सुदूरपश्चिम स्पोर्टस भेन्चर्सके बोर्डमे अन्य सदस्य थप्टी जैबी । सुदूरपश्चिम स्पोर्टस भेन्चर्सके धनगढी एफसीसे भर्खरे घोषणा हुइल नेपाल फुटबल लिगमे खेल्नके साथे ग्रास रुट ओ महिला फुटबलहे उकास्नफे लगानी करी ।

अब्बेक अवस्थामे लगानी भित्रनासे नेपाली फुटबलमे भारी सन्देश जाई व्यक्तिगत रुपमे मै यिहीहे बहुट सकरात्मक रुपमे लेहल बा । काठमाडौं स्पोर्टस डेभलपमेन्ट भेन्चर्सहे धनगढी एफसीमे स्वागत करे चाहठु । यिहीसे नेपाली फुटबलमे कुछ करे सेक्जाइ कना आउर डेखाइल बा । यैसिन खाले सम्झौतासे अन्य टोलीके ढोका खोल्नफे मद्दत मै विश्वास लेले बटी । यिहीसे सुदूरपश्चिमके पर्यटनसंग अन्य पक्षकेफे विकासके पाटो खोलल बा ।

काठमाडौं स्पोर्टस डेभलपमेन्ट भेन्चर्स प्रालीसे हम्रे क्रिकेटमे भारी लगानी करटी आइल बटी ओ यिहीसे अन्य खेलकुदमे लैजैना अनुरुप हम्रे धनगढी एफसीसे सुदूरपश्चिम स्पोर्टस भेन्चर्समे जोरल बा । नेपालके लोकप्रिय खेल फुटबलमे आवद्ध हुइना हमार लाग भारी अर्थ बा । नेपाली फुटबल अझ लोकप्रियताके डगरमे जैना उद्देश्यके साथे हम्रे आइल बटी अनुभव स्वार सिरोहिया, कार्यकारी निर्देशक, सुदूरपश्चिम स्पोर्टस भेन्चर्स ।