चाडपर्वसे एकताके सूत्रमे बाँध्न प्रेरित ः प्रदेश प्रमुख मियाँ 

धनगढी, २१ कार्तिक । सुदूरपश्चिम प्रदेशके प्रदेश प्रमुख नजिर मियाँ  चाडपर्वसे आपसी रिस, राग ओ द्वेष बिस्राके सक्कु नेपालीहे एकताके सूत्रमे बाँध्न प्रेरित कैना बटैले बटै ।

डेवारी, छठ पर्व २०८३ तथा नेपाल संवत् ११४७ के अवसरमे शुभकामना सन्देश जारी करटी उहाँ यैसिन पर्वहुक्रे राष्ट्र ओ राष्ट्रियताप्रतिके गहिर प्रेम, सामाजिक सद्भाव तथा धार्मिक सहिष्णुता अभिवृद्धि कैना थप प्रेरणा मिले कना कामना करले बटै ।

प्रदेश प्रमुख मियाँ डेवारी ओ छठ पर्वके अवसरमे स्वदेश तथा विदेशमे रहल सक्कु नेपाली डिडीबहिनीया तथा डाडुभैयामे सुख, समृद्धि, सुस्वास्थ्य एवं दीर्घायुके कामना करले बटै ।

उहाँ डेवारीहे मानव ओ अन्य जीवजन्तुबीचके सुसम्बन्धके प्रतीकके रूपमे उल्लेख करटी काग, कुकुर, गैयालगायतके जनावर तथा गोवर्धन पर्वतके पूजा अर्चना कैना यी पर्व प्रकृति ओ जीवजन्तुप्रतिके सम्मान झल्कैना बटैले बटै ।

ओजरार पर्व एवं दीपावलीके रूपमे समेत चिन्हा डेवारीसे आपसी सद्भाव अभिवृद्धि कैनाके साथे मौलिक संस्कृतिके पुस्तान्तरणमे महत्वपूर्ण योगदान पुगैटी  आइल उहाँ उल्लेख करले बटै ।

ओस्टेक करके, राष्ट्रिय विभूति शङ्खधर साख्वासे प्रवर्तन करल नेपाल संवत् नेवार समुदायके मौलिक संस्कृति ओ परम्परासंंग जोरल उल्लेख करटी उहाँ नयाँ वर्षके रूपमे मनैना यी संवत्से सांस्कृतिक पहिचानके संरक्षणमे योगदान पुगाइल बटैले बटै ।

छठ पर्वसेफे धार्मिक तथा सांस्कृतिक विविधताबीच एकता ओ सद्भाव कायम कैना महत्वपूर्ण भूमिका खेल्टी आइल  उहाँक कहाई बा ।

यी चाडपर्वसे विश्वके टमान स्थानमे छरल रहल नेपालीहुकनबीच आपसी सद्भाव, सहिष्णुता, भ्रातृत्व एवं पारस्परिक सहयोगके भावना थप प्रगाढ बनैना विश्वाससमेत उहाँ व्यक्त करले बटै ।