मघौटा गीत सार्वजनिक (भिडियोसहित)
पहुरा समाचारदाता
धनगढी, ६ पुस । थारु समुदायके बर्का टिहुवार माघ अइटी रहल बेला माघमे गैना ओ नाचजैना गीतमे यी बेला थारु कलाकारहुक्रे म्युजिक भिडियो बनैनामे व्यस्त रहल बाटै ।
खास कैके यी बेला उहाँहुक्रे माघमे नाचजैना मघौटा नाच ओ धमार लगायत गीतमे म्युजिक भिडियो निर्माणमे जुटल बाटै । यिहे बिच ‘बाबाकी सागरमा मुडिया लहाइ गैनु हा, टिकुली छुटल पानी घाट‘’ कना बोलके मघौटा गीतमे बनल म्युजिक भिडियो सार्वजनिक हुइल बा । म्युजिक भिडियो सीएस फिल्मस् प्रालि युट्यूब च्यानलसे सोम्मारके रोज सार्वजनिक हुइल बा ।
सुधराम दहितके निर्देशनमे हुइल म्युजिक भिडियोमे बीर चौधरी, भानु चौधरी, सुनिता दहित, महिमा चौधरी लगायतके कलाकार रहल बाटै ।
गीतमे गायिका सोमति थारु ओ गायक बिजय चौधरीके स्वर रहल बा । थारु कल्चरल गीत रहल म्युजिक भिडियो निर्माणसे थारुहुक्रनके पहिचान, कला संस्कृति संरक्षणमे टेवा पुग्ना गायिका सोमती थारुके विश्वास रहल बा । क्यामेरा ओ एडिट सतिश सिंन्हाके रहल बा । म्युजिक भिडियो कञ्चनपुरके सिंहपुर गाउँमे छायांकन हुइल बा ।
