‘आब सबकोइ नाचब माघमे…’ सार्वजनिक
पहुरा समाचारदाता
धनगढी, २२ पुस । थारु समुदायके लावा बरस एवं बर्का टिह्वार माघहे लक्षित करटी थारु चलचित्र तथा सांस्कृतिक संघ सुनसरी माघके लावा म्युजिक भिडियो सार्वजनिक करले बा ।
मंगरके सुनसरीके झुम्कामे एक कार्यक्रमके आयोजना कैके ‘आब सबकोइ नाचम माघमे…’ बोलके गीतके म्युजिक भिडियो विमोचन करल हो ।
विमोचन कार्यक्रममे थारु चलचित्र तथा सांस्कृतिक संघके केन्द्रीय अध्यक्ष परशुराम चौधरी थारुके भाषा, संस्कृति संस्कारहे बचाइक लाग थारु युवा सांस्कृतिक गीत संगीतके म्युजिक भिडियो लाने पर्ना जोड डेहल रहिट ।
थारु कल्याणकारिणी सभाके पूर्व केन्द्रीय अध्यक्ष चन्द्र कुमार चौधरी थारुनके माघहे किल नाइहोके सक्कु टिहवारहे चिन्हैना मेरके संगीतके सृजना हुइ पर्ना जोड डेलै ।
थारु चलचित्र तथा सांस्कृतिक संघ सुनसरीके जिल्ला अध्यक्ष जानकी चौधरी थारुनके मौलिक पर्व माघहे गीतमार्फत चिन्हाइ पाके हर्षित हुइल बटैली ।
गीतके शब्द ओ संगीत सुनिल चौधरी करले बाटै कलेसे उहाँ स्वयम गीतमे स्वर डेले बाटै । उहाँहे अनुमा चौधरी स्वरमे साथ डेले बाटी ।
म्युजिक भिडियोमे कलाकार जानकी चौधरी, दिनेश चौधरी, सबिता चौधरी, बिनोद चौधरी, सनम चौधरी, दिपिका चौधरी, गुन्जा चौधरी, कृष्ण चौधरी, एन्डिसा चौधरी, जनक चौधरी, ललिता चौधरी लगायतके अभिनय रहल बा । भिडियोके निर्देशन जनक चौधरी करले बाटै ।
