थारु भिटपटरामे थारु सम्बतके अलमल

थारु कल्याणकारिणी सभा (थाकस) क्षेत्रीय समिति देउखुरी लमहीमे आयोजित एक कार्यक्रममे देउखरके टमान गाउँक अगुवा ककनडार, भलमन्सनहे थारु भिटपटरा हस्तान्तरण कइले बा । ओस्टके लुम्बिनी प्रदेशके मुख्यमन्त्री शंकर पोखरेलहे फेन डोसर भेटघाटमे थाकस थारु भिटपटरा हस्तान्तरण कैले बा ।

कार्यक्रममे सक्कु अगुवनहे अपन अपन गाउँमे जाके भिटपटराके बारेम गँवलियनहे जानकारी करा डेहक लग अर्जि कइगैल बा । भिटपटराले थारुनके मना जैना टरटिह्वारमे असमन्जस नइ रना ओ स्थानीय, प्रदेश सरकारसे थारुनके विदा माग कैना फेन सजिल हुइना आयोजकके अपेक्षा बटिस ।

कुछ बरस यहोर थारु भिटपटरा बन्ना काम आगे बह्रल बा । सुरुमे थाकस रुपन्देहीके बाद पाछे कैलाली जिल्ला थारु भिटपटरा बनइना कामहे आगे बह्रैले रहे । जखोर लेक परिषद (इन्जल) नेपाल अभिन फेन थारु भिटपटरा छप्ना कामहे निरन्तरता डेटि बा । हेर्ना सहजिल होए कहिके दिलबहादुर चौधरी गोझु थारु पटरा फेन निकर्ले रहिट । थारुनके टिह्वारमे एकरुपता लन्ना उद्देश्य निस्चय फेन थारु भिटपटराके मजा काम हो ।

थारु समुदायके बसोबास पुरुब झापासे लेके पस्चिउँ कन्चनपुर टक बा । ओहेसे ठाउँ अनुसार थारु समुदायके मनैना टिह्वार फेन फरक फरक बा । खास कैके पुरुबओर मना जैना छठ, सामाचकेवा, जुरसिटल पस्चिउँके मनै सुन्ले फेन नै रहठाँ । कैलाली, कन्चनपुरओर मनाजैना भजहर टिह्वार दाङदेउखर ओरिक मनैन् पटे नै हुइन् । ओहेसे थारु भिटपटरामे सक्कु ओरिक थारुन्के टरटिह्वारबारे उल्लेख हुइना सराहनिय काम हो । इहिले औरे ओरिक अपने समुदायक टरटिह्वारबारे जानक लग उत्सुकता जागि । थाकस देउखरके भिटपटरामे सक्कु ओर मनाजैना टिउहारके तिथिमिति उल्लेख कैगिल जना गइल बा । मने सबसे अहम् सवाल इ बा कि इहि आधिकारिकता के डेना ? का थाकस देउखर भिटपटरा छप्नासे पहिले सबओर छलफल चलाइल ?

डोसर बाट थारु भिटपटराके साथ साथ यम्ने बेलस गइल थारु सम्बतबारे फेन बहस चलैना ओट्रे जरुरि बा । थारुनके लावा साल माघ १ गतेहे मानजाइठ कलेसे खै थारु सम्बत ? कना प्रस्नले थारु सम्बतके खोज्नि हुइल ढेर बरस नै हुइठो । मने थारु सम्बतके जलमकलम कसिक हुइल इ बारे बहुट जाने अनभिग्य बटाँ ।

भगवान बुद्धके जलम थारु समुदायमे हुइल रहे । हुँकार जलम २६ सय बरस पहिले हुइलहे आधार लेके थारु सम्बत बनाइल यकर प्रस्ताव करुइयनके बटिन । मने सहजिलसे जन्ना ओ मन्ना हिसाबसे कोइ ब्याख्या नै करठो । ओहसे परटेक बरस माघ १ गतेसे कै थारु सम्बत कहिके अलमल हुइठ । बहुट जे थारु भिटपटरामे २०७७ साल माघ १ से थारु सम्बत २६४४ लिख्ले बटाँ । ओहोर रुपन्देहीके थाकस सैनामैना इकाइ समिति अप्कि माघ मनाइबेर थारु सम्बत २६४५ के ब्यानर बनाइल । यकर प्रस्ताव करुइयन प्रस्ट जानकारि नै डेहटसम इ अलमल हुइल करि ।

थारु सम्बत नै बेल्सलेसे थारुनके लावा बरस माघ नै आइ कना नै हो । ओहेसे थारु भिटपटरा प्रकासनमे लागल टिम, थाकस लगायट समिति थारु सम्बतबारे व्यापक छलफल चलाइट । कहुँ हम्रे ‘रे’ के भरमे टे थारु सम्बत नै बेलसठुइ ?