थरुहट आन्दोलनमे काजे कम्ब्याट ड्रेस
‘शान्ति सद्भाव न्याय ओ अधिकारके लाग दासता विरुद्धके थरुहट थारुवान विशेष राष्ट्रिय सम्मेलन’के नारासहिट थरुहट थारुवान राष्ट्रिय मोर्चा सम्मेलनके टयारिमे जुटल बा । यकर लग मोर्चाके कैलाली जिल्लामे मेरमेरिक नगरपालिका ओ गाउँपालिका स्तरिय भेला टय हुइल बा । ओस्टक विशेष राष्ट्रिय सम्मेलनसे पहिले थरुहट थारुवान युवा, महिला, विद्यार्थी ओ बरघर भलमन्साके कैलाली जिल्ला सम्मेलन कैना जानकारि फेन आयोजक पक्ष जनैले बा ।
खास कैके टीकापुर घटना मुद्दामे उच्च अदालत दिपायलसे करल फैसला ओ प्रतिनिधि सभा विघटन विरुद्ध मोर्चासे धनगढीमे ५० हजार युवा उटारके शक्ति प्रदर्शन कैना जना गइल बा । पुस २ गते उच्च अदालत दिपायलसे इहिसे आघे जिल्ला अदालत कैलालीके फैसलाहे उल्ट्यइटी मोर्चाके केन्द्रीय संयोजक लक्ष्मण थारुसहितहे जन्मकैद फैसला सुनाइल रहे । उ फैसला विरुद्ध मोर्चा विरोधमे उट्रल बा । टीकापुर घटनाहे छानविन कैना गठित लाल आयोगके प्रतिवेदनहे आधार बनाके राजनीतिक घटनाके रुपमे सम्बोधन हुइ पर्ना ओ कैद सजाय सुनाइल नेता तथा कार्यकर्ताहे रिहाइ करे पर्ना माग मोर्चाके बा ।
मोर्चासे फागुन १५ ओ १६ गते धनगढीमे ५० हजार संख्यामे युवा उटारके शक्ति प्रदर्शन कैना खास बाट नइ हो । काजेकि आन्दोलनकारी शक्ति अपन कार्यक्रममे अटरा हजार संख्यामे उपस्थित हुइहि कना दावी कर्ना पुराने बाट हो । मने कम्ब्याट ड्रेसमे युवन उटर्ना जौन चेतावनी डे गइल बा, इ खास बाट हो । विप्लव माओवादी अब्बे सरकारसे वार्ताके बाटाबरन बनैटि रहल बेला थरुहट युवनके कम्ब्याट ड्रेसमे प्रदर्शनके समाचारले नागरिक अगुवन लगायट बहुटजहन झस्कैले बा ।
(नेकपा) ओली समुह अब्बे पूर्वमाओवादी खेमाके नेटन अपनओर टन्ना कोसिसमे बा । इहे क्रममे मंगरके रोज खानेपानी मन्त्री मणि थापा ललितपुरके नख्खु कारागार पुगके विप्लव समूहके नेता हेमन्त प्रकाश वली ‘सुदर्शन’ से लम्मा बाट बट्वाइल खबर आइल बा । मन्त्री थापा सुदर्शनसे ‘वार्ता प्रक्रिया चलाइ परल’ कना प्रस्टाव कर्ले रहिट ।
अब्बे हँठियार उठाइल समुहसे टे ओली सरकार वार्ताके वाटावरन बनाइटा कलेसे आन्दोलनके संगसंगे थरुहट थारुवान मोर्चा फेन इ बारेम मध्यस्तकर्ता मार्फट बाट काजे आगे नै बह्रैना ? थारु युवनके कम्ब्याट ड्रेसमे प्रदर्शनके समाचारले काजे झस्कैना काम कैना ? कम्ब्याट ड्रेस कहटि कि फौजि स्वरुप बिल्गैना ओर्से मोर्चा थरुहट आन्दोलनके स्वरुप बडलना चाहि ।
